თუ გვინდა, პროცესი დავიჭიროთ და ჭეშმარიტად დემოკრატიულ სახელმწიფოდ ჩამოვყალიბდეთ, პოლიტიკური ისტებლიშმენტი, მათ რიცხვში, დღევანდელი მთავარი პარტიაც უნდა განვითარდეს, – ამის შესახებ „ქართული ოცნების“ თავმჯდომარე ბიძინა ივანიშვილმა პირველი არხის ეთერში განაცხადა.
მისი თქმით, „ქართულ ოცნებას“ ძალიან ბევრი აქვს გასაკეთებელი იმისთვის, რომ ჭეშმარიტად ევროპულ პოლიტიკურ პარტიას დაემსგავსოს.
მისი თქმით, ყველაფერი ისე განვითარდება, როგორც ითქვა და მამუკა ბახტაძე პრემიერ-მინისტრი იქნება, თავად კი, პარტია „ქართული ოცნების“ თავმჯდომარე.
„პარტიაში უამრავი პრობლემაა, რადგან ის რეალურად, არჩევნებიდან არჩევნებამდე არსებობდა და საზოგადოებამ ძალიან მწირად თუ იცის მისი იდეოლოგია“, – განაცხადა ბიძინა ივანიშვილმა.
მისი თქმით, პარტიაში, განსაკუთრებით, რეგიონებში, უნდა მოხდეს უფრო მეტი ახალგაზრდის ჩართულობა, უფრო მეტი ახალი კადრის მოძიება და ა.შ.
მისი განცხადებით, მთავრობასთან და ხელისუფლების სხვა ნაწილთან მკვეთრი ურთიერთობა პარტიის მოედანზე ექნება, სადაც შეიძლება, ეკონომიკური საბჭო შეიქმნას, რომელშიც პროფესიონალები პარლამენტიდანაც იქნებიან და მთავრობიდანაც.
„ისე არა, დამახინჯებით, რომ სხვისი საქმე ვაკეთო. ყველა თავის საქმეს გააკეთებს. ჩვენ უნდა მოვახერხოთ, გუნდი გავამთლიანოთ, გავაძლიეროთ და მმართველობა უფრო ეფექტური გავხადოთ“, – აღნიშნა ბიძინა ივანიშვილმა.
