20 წლის ანა ნაცვლიშვილის მკვლელობაში ბრალდებულ ლადო გრიგალაშვილის ადვოკატი, ნაირა ოტიაშვილი „ჯი-ეიჩ-ენთან“ აცხადებს, რომ გრიგალაშვილს მკვლელობა არ უღიარებია. ადვოკატის განმარტებით, ფარული საგამოძიებო მოქმედებების შედეგად მოპოვებულ ვიდეომასალაში ბრალდებული საუბრის დასასრულს, ფურცელს კეცავს და მაგიდაზე დებს, რაც მისივე განმარტებით, იმაზე მიანიშნებს, რომ გრიგალაშვილს დაუწერეს, თუ რა უნდა ეთქვა.
„მე არ მიმაჩნია, რომ ეს აღიარებაა. ეს არ იყო ფარული ვიდეო ჩანაწერი, ეს იყო გამოკითხვა, რომელსაც თავისი პროცესუალური სახე და ფორმა აქვს, რაც ამ შემთხვევაში დარღვეულია. ამასთანავე, ხარვეზებიანი ჩანაწერი გამოვიკვლიეთ. გრიგალაშვილმა იქ რა თქვა, რა წაიკითხა, არ ვიცი. ბოლოში, მან ფურცელი დაკეცა.
მას წინასწარ დაუწერეს თუ რა ეთქვა და წაიკითხა. ვინ დაუწერა, ამაშია საქმე. დღეს უნდა დაკითხულიყო სუჯაშვილი, რომელმაც გამოკითხვა აწარმოა. შესაძლოა, მან იცოდეს ეს ტექსტი ვინ დაუწერა. ფაქტია, რომ ვიდეოში ფურცლის დაკეცვის ხმა ისმის, რომელიც გრიგალაშვილმა მაგიდაზე დადო“, - აცხადებს ოტიაშვილი.
„ჯი-ეიჩ-ენის“ კითხვაზე, თუ რას იტყოდა, ექსპერტისა და გამომძიებლის ჩვენებაზე, რომლის მიხედვითაც, ბრალდებულის მამის კუთვნილ მანქანაში აღმოჩენილ დანაზე მოკლული ნაცვლიშვილის სისხლი იქნა აღმოჩენილი, ოტიაშვილი პასუხობს, რომ მანქანის გასაღები რამდენიმე საათის განმავლობაში ვის ჰქონდა, უცნობია. შესაბამისად, ის აღნიშნულის გაყალბებას არ გამორიცხავს.
„ამ დანით არის თუ არა დანაშაული ჩადენილი, ჯერ ეს უნდა დადგინდეს. მანქანის გასაღები, დილის 10 საათიდან საღამოს 6 სათამდე სად იყო, კაცმა არ უწყის. გასაღები ბრალებულის მამას, ზაქარია გრიგალაშვილს ვერ ექნებოდა, ვინაიდან მანქანას ბრალდებული მართავდა, მანქანა მან გააჩერა, შესაბამისად, გასაღები მას ჰქონდა. საიდან აღმოჩნდა გასაღები ან ზაქარია გრიგალაშვილთან, ან გამომძიებელთან, ეს განმარტებული არ არის.
თუ ეს ის დანა არაა, რომლითაც მკვლელობა მოხდა, ეს ნიშნავს, რომ საქმე გაყალბებულია. დანა სხვა ზომისაა, ჭრილობები კი - სხვა“, - აცხადებს ოტიაშვილი.
აღნიშნულ საქმეზე დღევანდელ პროცესზე ფარული საგამოძიებო მოქმედებების შედეგად მოპოვებული ვიდეომასალა გამოიკვლიეს, რომელშიც ლადო გრიგალაშვლი ჰყვება, თუ როგორ მოკლა მან ანა ნაცვლიშვილი.
დღესვე გამოიკითხნენ საქმის გამომძიებელი და ექსპერტი.
შემდეგი სხდომა 31 ივლისს, 11:00 საათზე ჩაინიშნა.
ცნობისთვის, 20 წლის ანა ნაცვლიშვილის მკვლელობის საქმეზე მოკლულის შეყვარებული, ლადო გრიგალაშვილი დააკავეს, ის ჩადენილ დანაშაულს არ აღიარებს.
