საქმეში არსებობდა, როგორც პირდაპირი, ისე სხვა მტკიცებულებები, რომელიც გონივრულ ეჭვს მიღმა სტანდარტს აკმაყოფილებდა, - ასე შეაფასა საქართველოს ყოფილი პრეზიდენტის, მიხეილ სააკაშვილის მიმართ გამოტანილი გამამტყუნებელი განაჩენი საქმის პროკურორმა, ირაკლი ნადარეიშვილმა.
როგორც ის განმარტავს, საქმეში არსებული მტკიცებულებების საფუძველზე, ბრალდების მხარეს გამამტყუნებელი განაჩენის მოლოდინი ჰქონდა.
„სასამართლოს ასეთ გადაწყვეტილებას ბრალდების მხარე ელოდებოდა. მტკიცებულებების, არგუმენტების და დასაბუთებული ფაქტების საფუძველზე, ბრალდების მხარეს გააჩნდა ეს მოლოდინი, განსაკუთრებით იმის ფონზე, რომ დაცვის მხარეს ერთადერთი მოწმე ჰყავდა, რომელზეც აპელირებდა. დაცვის მხარის ეს ერთადერთი მოწმე იყო დათა ახალაია, რომელიც ამავე საქმეზე სხვა ეპიზოდზეა ბრალდებული და დღეის მდგომარეობით მიმდინარეობს მის მიმართ საქმის განხილვა საქალაქო სასამართლოში. აქედან გამომდინარე საქმეზე შეკრებილი იმ მტკიცებულებების, ფაქტებისა და არგუმენტების ერთობლიობით, ბრალდების მხარე ელოდებოდა სააპელაციო სასამართლოს მხრიდან გამამტყუნებელი განაჩენის ძალაში დატოვება“, - აცხადებს ნადარეიშვილი.
მისივე განმარტებით, განაჩენი სამართლებრივ მტკიცებულებებს ემყარება და საქმე პოლიტიკურ ჭრილში არ უნდა გადაიყვანონ.
„სასამართლო განხილვების დაწყების დღიდან დაცვის მხარის ერთადერთი არგუმენტი და ლაიტმოტივი, რაც გასდევდა მის როგორც შესავალ, ასევე დასკვნით სიტყვებს, ეს არის პოლიტიკური ელემენტებით გაჟღერებული მოტივები და ცდილობდა სამართლებრივი პროცესი პოლიტიკურ ჭრილში გადაეტანა. სისხლის სამართლის საქმეზე განაჩენიც და ბრალდებაც ემყარებოდა მხოლიდ სამართლებრივ მტკიცებულებებს და არგუმენტებს“, - დასძენს ნადარეიშვილი.
ცნობისთვის, დღეს, თბილისის სააპელაციო სასამართლომ სრულად გაიზიარა ბრალდების მხარის პოზიცია და უცვლელად ძალაში დატოვა თბილისის საქალაქო სასამართლოს 2018 წლის 5 იანვრის განაჩენი მიხეილ სააკაშვილის მიმართ, რომლითაც სანდრო გირგვლიანის საქმეზე მსჯავრდებული პირების შეწყალებისას სამსახურებრივი უფლებამოსილების ბოროტად გამოყენების ფაქტზე საქართველოს ყოფილი პრეზიდენტი მიხეილ სააკაშვილი ცნობილი იქნა დამნაშავედ საქართველოს სისხლის სამართლის კოდექსის 332-ე მუხლის მეორე ნაწილით.
სასამართლოს განაჩენით მსჯავრდებულ მიხეილ სააკაშვილს სასჯელის ზომად, „ამნისტიის შესახებ“ საქართველოს კანონის გამოყენებით განესაზღვრა სამი წლის ვადით თავისუფლების აღკვეთა, მასვე დამატებითი სასჯელის სახით თანამდებობის დაკავების უფლება ერთი წლითა და ექვსი თვის ვადით ჩამოერთვა.
