გვითხრეს, რომ ანა ნაცვლიშვილი ყელგამოჭრილი ნახეს. ალბათ, ერთ საათში პოლიციაში მითხრეს, შენი ძმაკაცის მოკლულიაო, ძალიან გამიკვირდა, მაგრამ იმდენი ფაქტი მომიყვანეს, ამის დაჯერება რთული აღარ იყო, - განაცხადა სასამართლო სხდომაზე, ანა ნაცვლიშვილის მკვლელობაში ბრალდებულის, ლადო გრიგალაშვილის მეგობარმა.
როგორც ის განმარტავს, მაშინ როცა ანა ნაცვლიშვილს ეძებდნენ, გრიგალაშვილი მკვლელობის ადგილზე გავლისას აფორიაქდა.
"ნანგრევებისკენ, სადაც მკვლელობა მოხდა, ლადომ შეშინებულმა გაიხედა, ვკითხე კიდეც რა მოხდა-მეთქი, არაფერი, კაცი დავინახეო, მიპასუხა", - აცხადებს მოწმე.
როგორც ის აღნიშნავს, გრიგალაშვილსაც და მოკლულ გოგონასაც ბავშვობიდან იცნობს. მოწმის თქმითვე, ბრალდებულმა მას ანას ძებნის დაწყება სწორედ იმ ადგილიდან მიუთითა, სადაც მკვლელობა მოხდა.
"ლადო გრიგალაშვილს მე-5 კლასიდან ვიცნობ, ანასაც ვიცნობდი. ჰქონიათ უთანხმოებები, დაშორებულებიც ყოფილან, ბოლო პერიოდში არცერთთან არ მისაუბრია.
2017 წლის 22 თებერვალს, დილით 7-ის 20 წუთზე ლადომ დამირეკა და მთხოვა, ანა ნაცვლიშვილის კორპუსთან ჩავსულიყავი. რატომ-მეთქი ვკითხე, ანა დაიკარგაო მითხრა...
ორი მანქანით ავედით ანას სახლთან. ცოტა ხნის ლოდინის შემდეგ, მაინც და მაინც მე მიმითითა იქ ჩავსულიყავი, სადაც ცხედარი იყო. იქ დათო ალექსიძესთან ერთად ჩავედით, ფარეხთან დაცვის პოლიცია იყო, ვიკითხეთ ღამის 4 საათიდან ჩემი სიმაღლის გოგოს ხომ არ გამოუვლია, არაო - მითხრეს.
ისევ ანას სახლთან ავბრუნდით. ანას მამის ჩამოსვლის შემდეგ ზეემკაზე, ანას მეგობართან წავედით", -აცხადებს ბრალდებულის მეგობარი.
