მსგავსი განცხადებები რუსეთის ხელისუფლების წარმომადგენლების მხრიდან ხშირად გვესმის, ეს პირველი არ არის, – ასე გამოეხმაურა პარლამენტის საგარეო ურთიერთობათა კომიტეტის თავმჯდომარე სოფიო ქაცარავა ვლადიმერ პუტინის განცხადებას, რომ რუსეთს საქართველოსა და უკრაინის ნატო-ში გაწევრიანებაზე უკიდურესად ნეგატიური რეაქცია ექნება.
მისი თქმით, საქართველოს საგარეო პრიორიტეტია ევროპულ და ევროატლანტიკურ ინსტიტუტებში გაწევრიანება.
„ჩვენ ჩვენი პოლიტიკური დღის წესრიგი და პრიორიტეტები გვაქვს. ჩვენი საგარეო პრიორიტეტია ევროპულ და ევროატლანტიკურ ინსტიტუტებში გაწევრიანება. ამისთვის ჩვენ ძალიან თანმიმდევრული პოლიტიკა გვაქვს და პირველ რიგში, ეს ყველაფერი, როგორც საქართველოში, ასევე რეგიონში უსაფრთხოებას და სტაბილურობას ემსახურება. შესაბამისად, ჩვენ ჩვენს თანმიმდევრულსაგარეო პოლიტიკას გავაგრძელებთ სწორედ იმისთვის, რომ ქვეყანაში უსაფრთხოება და სტაბილურობა უზრუნველვყოთ“, – განაცხადა ქაცარავამ, რომელმაც აქვე აღნიშნა, რომ საქართველო საერთაშორისო ასპარეზზე აქტუალური და აქტიურია, როგორც არასდროს.
მისი თქმით, ეს გამოიხატება მართლაც უპრეცედენტო მხარდაჭერით საერთაშორისო საზოგადოების მხრიდან, მათ შორის ამერიკის შეერთებული შტატების მხრიდან და ჩვენ ამის დასტური არაერთხელ ვნახეთ. მისივე განცხადებით, ამერიკის მხრიდან ძალიან მტკიცე ორპარტიული მხარდაჭერა გვაქვს, რაც არაერთ რეზოლუციაში, განცხადებაში და მაღალი დონის ვიზიტში გამოიხატა.
