ფრაქცია ”ნაციონალური მოძრაობის” თავმჯდომარის, რომან გოცირიძის განცხადებით, შრომის უსაფრთხოების გამოსწორების მიმართულებით მმართველი ძალა არაფერს აკეთებს.
მისივე თქმით, „ამათ მიიღეს კანონი და შემოდეს სასთუმალ ქვეშ და ჰგონიათ, რომ ეს კანონი თავისი სვლით მიდის და აკეთებს. სისტემის აწყობაა საჭირო".
„რაც შეეხება დახურვას, ჰკითხა იქ დასაქმებულ ადამიანებს დახურვის შემდეგ რა უნდა გააკეთონ? სად დაასაქმებენ? როცა დახურავ, მაშინ ალტერნატიული სამუშაო ადგილები უნდა იყოს შექმნილი და რაღაც შეთავაზება უნდა ჰქონდეს ადამიანებს. ამიტომ, ყველა გადაწყვეტილება შრომის უსაფრთხოების მიმართულებით არის არასწორი ხელისუფლების მხრიდან, ვინაიდან არავის უზრუნია შესაბამისი ნაბიჯების გადასადგმელად“, - განაცხადა რომან გოცირიძემ.
ცნობისთვის, ტყიბულში, მინდელის სახელობის შახტში 4 მუშა დაიღუპა და 6 დაშავდა. შსს-ს ცნობით, გამოძიების პირველადი ინფორმაციით, მინდელის შახტის ერთ-ერთ გვირაბში, სავარაუდოდ მეთანის აფეთქების შედეგად კედლების დეფორმაციას ჭერის ჩამოშლა მოჰყვა. ფაქტზე გამოძიება საქართველოს სისხლის სამართლის კოდექსის 240-ე მუხლის მეორე ნაწილით მიმდინარეობს.
