„ქართულ ოცნებასა“ და ბიძინა ივანიშვილს ისეთი მთავარი პროკურორი უნდათ, რომელიც მიკერძოებული არ იქნება და დანაშაულის მიმართ მკაცრი იქნება, ასეთია შალვა თადუმაძე, - ამის შესახებ პარლამენტის ვიცე-სპიკერმა გია ვოლსკიმ ჟურნალისტებს განუაცხადა.
მისი თქმით, ის ფიქრობს, რომ საკანონმდებლო ორგანო მთავარ პროკურორად შალვა თადუმაძის კანდიდატურას მხარს დაუჭერს.
„არის გარკვეული თემები, მათ შორის წართმეული ქონების საკითხი, ქონების დაბრუნება მიმდინარეობს, მაგრამ ინტენსივობა დაბალია და ეს თემა მაინტერესებს. შალვა თადუმაძეს კარგად ვიცნობ და მისი დიდი რესურსი ვიცი. სამწუხაროა, რომ დღეს ოპოზიცია არ არის და თავისი “პრინციპულობით” თავს არ გამორჩენს, მაგრამ არაუშავს. „ქართულ ოცნებასა“ და ბიძინა ივანიშვილს ისეთი მთავარი პროკურორი უნდათ, რომელიც მიკერძოებული არ იქნება და დანაშაულის მიმართ მკაცრი იქნება, ასეთია შალვა თადუმაძე. ვინც არ უნდა შეგვერჩია, ნებისმიერი პირი ამ კრიტერიუმებს დააკმაყოფილებდა”, – განაცხადა ვოლსკიმ.
მისი თქმით, მთავარი პროკურატურა უფრო ღია და გამჭვირვალე უნდა იყოს და ასეთ შემთხვევაში უფრო კარგად დავინახავთ, რომ პროკურატურას უამრავი საქმე ძალიან მაღალ დონეზე აქვს გამოძიებული. მისივე თქმით, სამწუხაროდ, საზოგადოებამ მხოლოდ ის ნაწილი იცის, სადაც რაიმე პრობლემა და სკანდალი შეიქმნა, რაც მისივე განცხადებით, ხშირი არ არის.
