დღეს სასამართლომ განაჩენი გამოუტანა პროკურატურის სრულიად არასწორ გამოძიებას და ნათლად დაგვანახა, როგორ ჩატარდა ეს გამოძიება, – ამის შესახებ პრეზიდენტის საპარლამენტო მდივანმა ანა ნაცვლიშვილმა ხორავას ქუჩაზე მოკლულ დავით სარალიძის მამასთან შეხვედრისას განაცხადა.
მისი თქმით, სისტემა არის კრიზისში
„თვეების განმავლობაში დაზარალებული, შვილმკვდარი მშობლები ითხოვდნენ სამართლიან გამოძიებას და იყო არაერთი დასაბუთებული პრეტენზია გამოძიების მისამართით. ამ კითხვებს პასუხი არ გასცემია.
დღევანდელმა სასამართლომ დაადასტურა, რომ ეს კითხვები პასუხგაუცემელი რჩება. უფრო მეტიც, დღეს სასამართლომ განაჩენი გამოუტანა პროკურატურის სრულიად არასწორ გამოძიებას და ნათლად დაგვანახა, როგორ ჩატარდა ეს გამოძიება.
ამ სიტუაციაში არ იქნება საკმარისი, რომ კონკრეტული ადამიანების პასუხისმგებლობის საკითხი დადგეს, ვინც ამ სიტუაციამდე მიიყვანა საქმე, ეს სისტემა თავიდან ბოლომდე შესაცვლელია. სისტემა არის კრიზისში. ამას აჩვენებს ძალიან ბევრი საქმე, მათ შირის დღევანდელი სასამართლოს გადაწყვეტილება. სისტემური რეფორმები უნდა გატარდეს, მხოლოდ ცალკეული ადამიანების პასუხისმგებლობა ვერ შეცვლის ამ ვითარებას.
ამას ვითხოვდით ჩვენც, რომ იმ ადამიანებს რომლებიც წლების განმავლობაში ძალადობას აფორმებდნენ და მხოლოდ ამ ფორმებით იციან მუშაობა, მათ უნდა დატოვონ პროკურატურის სისტემა“, – განაცხადა ანა ნაცვლიშვილმა.
