საპარლამენტო უმრავლესობის წევრი, რომან კაკულია, მომხრეა, რომ თბილისში ხორავას ქუჩაზე არასრულწლოვნების მკვლელობის საქმესთან დაკავშირებით, პარლამენტში დროებითი საგამოძიებო კომისია შეიქმნას. ამის შესახებ რომან კაკულიამ ბიუროს სხდომაზე განაცხადა და აღნიშნა, რომ კომისიის შექმნის გადაწყვეტილებით, პარლამენტი საზოგადოებას აჩვენებს, რომ მათთან ერთადაა.
მისი თქმით, როგორც წესი, კომისია იქმნება იმ შემთხვევაში, როცა ყველა სხვა ინსტრუმენტი იწურება, თუმცა მოცემული ვითარება არაორდინალურია. გამორიცხული არ არის, რომ სამივე ინსტანციის სასამართლომ იგივე გადაწყვეტილება მიიღოს. საზოგადოებას კი, პარლამენტმა უნდა უთხრას, რომ მთელ მოცემულ პროცესში პარლამენტი არის მათ გვერდით. „ახლა ჩვენ კომუნიკაცია გვაქვს საზოგადოებასთან პირდაპირ და ძალიან მნიშვნელოვანია, საზოგადოებას ვუთხრათ, რომ იმ მეორე პროცესშიც, რომელიც გაგრძელდება, ჩვენ პარლამენტი ვართ მათ გვერდით.
ჩემი აზრით, ეს არის ყველაზე მთავარი. რატომ შეუქმნის ეს – კომისიის შექმნა, რაიმე პრობლემას ამ პროცესს, მართალი გითხრათ, არ მესმის. წარმოვიდგინოთ, რომ მეორე ინსტანციაზეც იგივე შედეგი დადგა, მესამეზეც ხომ შეიძლება იგივე შედეგი დადგეს. ამიტომ, ვერ ვხედავ მიზეზს, რომ ეს ფიქრი გადავიყვანო იმ ლოგიკურ ფიქრში, როდესაც კომისიას ვქმნით მხოლოდ იმ შემთხვევაში, როცა სხვა ინსტრუმენტების ამოწურვას უნდა დაველოდოთ და მერე შევქმნათ. ჩემი აზრით, ეს ის შემთხვევა არ არის,“ – განაცხადა რომან კაკულიამ.
