საქართველოს პარლამენტი სირიის მიერ ოკუპირებული ტერიტორიების აღიარებასთან დაკავშირებით განცხადებას მიიღებს.
ამის შესახებ განცხადება დღეს პარლამენტის ბიუროს სხდომაზე საპარლამენტო უმრავლესობის ლიდერმა არჩილ თალაკვაძემ გააკეთა.
როგორც მან აღნიშნა, სირიის არალეგიტიმური ხელისუფლების მიერ განხორციელებულ ქმედებაზე პასუხისმგებელი არის რუსეთი და პარლამენტი ამასთან დაკავშირებით აუცილებლად მოახდენს რეაგირებას.
„ეს იყო რუსეთის მხრიდან მანიპულირებული გადაწყვეტილება და ასადის რეჟიმმა ამით მხარი დაუჭირა აგრესიას, ოკუპაციას და დაარღვია საერთაშორისო სამართლის ნორმები. ამასთან დაკავშირებით სათანადო შეფასება უნდა გაკეთდეს პარლამენტის მხრიდან, რაზეც მუშაობა უკვე დაწყებულია“ - განაცხადა თალაკვაძემ.
მის ამ განცხადებას ბიუროს სხდომაზევე დაეთანხმა ფრაქცია „ევროპული საქართველოს“ წარმომადგენელი გიორგი კანდელაკი და განაცხადა, რომ ოპოზიცია ამ გადაწყვეტილებას მხარს დაუჭერს.
