„ვერ გეტყვით, რომ კარგად არის, აწუხებს ხერხემალი, გული, წნევები აქვს, მაგრამ მიუხედავად ამისა, ის შემართებითაა, დარწმუნებულია, ამ ბოროტებაში გამოჩნდება ნათელი წერტილი და გაიმარჯვებს სიმართლე!“, - განაცხადა „ჯი-ეიჩ-ენთან“ მსჯავდრებულ დეკანოზ გიორგი მამალაძის ძმამ, თორნიკე მამალაძემ.
ის ძმას ერთწლიანი პატიმრობის განმავლობაში ვრცლად სასაუბროდ პირველად ახლა შეხვდა. საკანში გატარებული 24 საათის შემდეგ, თორნიკე მამალაძე აცხადებს, რომ დეკანოზი საკუთარი სიმართლის დასამტკიცებლად უკვე სტრასბურგის სასამართლოში იბრძოლებს.
„ზოგადად, ყველაფერზე ვილაპარაკეთ, შევეხეთ სხვადასხვა თემებს. ვისაუბრეთ სამომავლო გეგმებზეც და აუცილებლად წავალთ სტრასბურგში რაზეც უკვე მიდის მუშაობა და სადაც აუცილებლად გავიმარჯვებთ“, - აღნიშნავს მამალაძე.
კითხვაზე, არის თუ არა დეკანოზი კონკრეტულ სასულიერო პირებზე განაწყენებული, მამალაძე ასე პასუხობს:
„ის მართლმადიდებელი სასულიერო პირია და ყველას შეუნდო ვისგანაც გული ეტკინა და ამ გულისტკივილისგან ის განთავისუფლდა“, - აღნიშნავს დეკანოზის ძმა.
ცნობისთვის, 12 თებერვალს, თბილისის სააპელაციო სასამართლომ უცვლელად დატოვა საქალაქო სასამართლოს გადაწყვეტილება ე.წ. ციანიდის საქმეში მსჯავრდებულ დეკანოზ გიორგი მამალაძისთვის 9 წლიანი თავისუფლების აღკვეთის შესახებ.
დეკანოზი გიორგი მამალაძე 2017 წლის 10 თებერვალს დააკავეს. მთავარმა პროკურატურამ დაკავების თავდაპირველ მიზეზად „მაღალი იერარქიის სასულიერო პირის სიცოცხლის ხელყოფის მცდელობა“ დაასახელა.
აღნიშნულმა არამხოლოდ საზოგადოება, არამედ, პრემიერ-მინისტრიც შეიყვანა შეცდომაში, რომელმაც განაცხადა, რომ საზოგადოებამ თავიდან უდიდესი უბედურება აიცილა და რომ ეს იყო, ქვეყნის წინააღმდეგ მიმართული დანაშაული.
მოგვიანებით კი აღმოჩნდა, რომ დეკანოზის ბრალი სულ სხვა იყო. სახელმწიფო ბრალდების მტკიცებით, მამალაძე პატრიაქრის მდივან-რეფერანტის, შორენა თეთრუაშვილის ანგარების მოტივით მკვლელობას გეგმავდა და სწორედ ამ მიზნით ცდილობდა ის მომწამვლელი ნივთიერების, ციანიდის შეძენას.
აღნიშნული ბრალდება თბილისის საქალაქო სასამართლომ დამაჯერებლად არ მიიჩნია და 2017 წლის 5 სექტემბერს, დეკანოზ გიორგი მამალაძეს მხოლოდ მკვლელობის მომზადებისთვის მიუსაჯა 9 წლით თავისუფლების აღკვეთა. საქმის განხილვამ საქალაქოდან სააპელაციო სასამართლოში გადაინაცვლა. დაცვის მხარე გამამართლებელი განაჩენის გამოტანას, ბრალდების მხარე კი ბრალის დამძიმებას და განაჩენში მკვლელობის ანგარებით მომზადების ჩამატებას ითხოვდა.
ამჯერად, დეკანოზი უზენაესი სასამართლოს განაჩენის მოლოდინშია.
