როგორც ჭორაობდა პარლამენტის ტრიბუნიდან, ისე გააგრძელა სუს-შიც მამუკა მდინარაძემ და ყოფილი კოლეგა ოპოზიციიდან ისეთი მოტივით დააჭერინა, თავისიანებიც კი გააოცა, - ამის შესახებ ოპოზიციონერი პოლიტიკოსი თეონა აქუბარდია სოციალურ ქსელში წერს.
აქუბარდია ეხმიანება „ნაციონალური მოძრაობის“ პოლიტსაბჭოს წევრის ლევან ხაბეიშვილის დაკავებას
„როგორც ჭორაობდა პარლამენტის ტრიბუნიდან, ისე გააგრძელა სუს-შიც მამუკა მდინარაძემ და ყოფილი კოლეგა ოპოზიციიდან ისეთი მოტივით დააჭერინა, თავისიანებიც კი გააოცა.
არც ფარული ჩანაწერები რევოლუციაზე, არც დიფსთეითის ხაზი, მხოლოდ სატელევიზიო დაპირება ჯილდოზე ძალოვანი უწყების თანამშრომლებისადმი.
თან ოლიგარქის კობახიძე ისე შეშინებულა, არიქა და სადმე რამე არ მიხიმანდრონ გაგდებულებმაო, რომ ღარიბაშვილის თავდაცვის მინისტრი ბურჭულაძეც წააკლა ხაბეს და სასწრაფოს მანქანით კორუფციის ბრალით ციხეში გაუშვა.
ოცნების შიგნით დიდი არეულობა სახეზეა ყოფილებსა და მოქმედებს შორის. ეს დაკავებებიც სწორედ პანიკის მაჩვენებელია.
თავისუფლება ყველა პოლიტპატიმარს!
ცეცხლი ოლიგარქიას!“ - წერს თეონა აქუბარდია.
შეგახსენებთ, სახელმწიფო უსაფრთხოების სამსახურის ინფორმაციით, „ნაციონალური მოძრაობის“ ერთ-ერთი ლიდერი, ლევან ხაბეიშვილი ქრთამის სახით მოხელეებისთვის ფულადი თანხების საჯაროდ დაპირების ფაქტზეა დაკავებული.როგორც სუს-ში განაცხადეს, „ლევან ხაბეიშვილის ქმედებაში იკვეთება დანაშაულის ყველა ნიშანი, რომელიც გათვალისწინებულია სისხლის სამართლის კოდექსის 339-ე მუხლის მეორე ნაწილით და ის დაკავებულ იქნა ბრალდებულის სახით მოსამართლის განჩინების საფუძველზე.დანაშაული სასჯელის სახით 4-დან 7 წლამდე თავისუფლების აღკვეთას ითვალისწინებს.
ასევე, სუს-მა დაადასტურა ოპოზიციონერი პოლიტიკოსის მურთაზ ზოდელავას დაკავება. როგორც სუს-ში გამართულ ბრიფინგზე განმარტეს, მურთაზ ზოდელავამ სცადა გაქცევა, რა დროსაც გაუწია ფიზიკური წინააღმდეგობა ანტიკორუფციული სააგენტოს თანამშრომლებს და იძალადა ერთ-ერთ მათგანზე. უწყებაში განაცხადეს, რომ ზოდელავას ქმედება სისხლის სამართლის კოდექსის 353-ე მუხლით კვალიფიცირდება, რაც 2-დან 5 წლამდე თავისუფლების აღკვეთას ითვალისწინებს.
