მგონია, რომ სასამართლოს გადაწყვეტილება სწორია, - ასე გამოეხმაურა მმართველი გუნდის წევრი გედევან ფოფხაძემ „აიისას“ საქმეზე თბილისის საქალაქო სასამართლოს გადაწყვეტილებას.
მისი თქმით, გამოხატვის უფლება აბსოლუტური უფლება არ არის, რითაც ადამიანმა შეიძლება ისარგებლოს.
„შეიძლება ვიღაცის უახლოესი ნათესავი რომ დახატონ? თუ პერსონალიებზე გადავალთ, ვიღაცაზე ნაწყენი ვარ და მისი დედა პრეზერვატივზე რომ გამოვსახო, ეს ნორმალური იქნება? ადამიანს ასეთი უფლება უნდა ჰქონდეს?", - განაცხადა ფოფხაძემ, რომელმაც აქვე აღნიშნა, რომ ყველას უნდა გვქონდეს იმის სამოქალაქო მოვალეობა, რომ სხვის უფლებებს არა მხოლოდ მატერიალურად არ შევეხოთ, არამედ ერთმანეთის გრძნობებსაც გავუფრთხილდეთ, რადგან მისივე თქმით, ესეც არის სიკეთე.
ცნობისთვის, თბილისის საქალაქო სასამართლომ პრეზერვატივ „აიისას“ საქმეზე თბილისის მერიის განცხადება დააკმაყოფილა.
გადაწყვეტილება თბილისის საქალაქო სასამართლოს მოსამართლე ლაშა თავართქილაძემ გამოაცხადა.
საქალაქო სასამართლომ მიიჩნია, რომ პრეზერვატივის შეფუთვაზე ორ თითზე წამოცმული პრეზერვატივისა და თამარ მეფის გამოსახვამ საზოგადოების მორალი და ღირსება შელახა. კომპანია 500 ლარით დაჯარიმდა და წარმოებიდან 4 სახეობის პრეზერვატივის ამოღება დაევალა.
როგორც „ჯი-ეიჩ-ენს“ „საქართველოს დემოკრატიულ ინიციატივაში“ განუცხადეს, „აიისა“ თბილისის საქალაქო სასამართლოს გადაწყვეტილებას სააპელაციოში გაასაჩივრებს.
