პრეზერვატივების კომპანია „აიისა“ თბილისის საქალაქო სასამართლოს გადაწყვეტილებას სააპელაციოში გაასაჩივრებს, - ამის შესახებ „ჯი-ეიჩ-ენს“ „საქართველოს დემოკრატიულ ინიციატივაში“ განუცხადეს, რომელიც კომპანიის ინტერესებს იცავს.
შეგახსენებთ, თბილისის საქალაქო სასამართლომ პრეზერვატივ „აიისას“ საქმეზე თბილისის მერიის განცხადება დააკმაყოფილა.
გადაწყვეტილება თბილისის საქალაქო სასამართლოს მოსამართლე ლაშა თავართქილაძემ გამოაცხადა.
საქალაქო სასამართლომ მიიჩნია, რომ პრეზერვატივის შეფუთვაზე ორ თითზე წამოცმული პრეზერვატივისა და თამარ მეფის გამოსახვამ საზოგადოების მორალი და ღირსება შელახა. კომპანია 500 ლარით დაჯარიმდა და წარმოებიდან 4 სახეობის პრეზერვატივის ამოღება დაევალა.
ცნობისთვის, აიისას-ს მფლობელის ანი გაჩეჩილაძის მიმართ ქალაქ თბილისის მერიის ზედამხედველობის საქალაქო სამსახურის მიერ შედგენილ ადმინისტრაციულ სამართალდარღვევის ოქმის განხილვა თბილისის საქალაქო სასამართლოში 2 მაისს შედგა.
მერია მიიჩნევდა, რომ პრეზერვატივ „აიისას“ შეფუთვაზე დატანილი ვიზუალიზაცია არაეთიკურია, რადგან ლახავს საზოგადოებრივ მორალს, კონკრეტული საზოგადოებრივი ჯგუფის რელიგიურ გრძნობებსა და ეროვნულ ღირსებას. თბილისის მერია პრეზერვატივის მწარმოებლის დაჯარიმებას (500 ლარის ოდენობით) და მისთვის მსგავსი შეფუთვისა და რეკლამის სამომავლო გამოყენების აკრძალვას მოითხოვს.
GDI, რომელიც ანი გაჩეჩილაძის ინტერესებს იცავს, იმედს იტოვებდა, რომ სასამართლო გადაწყვეტილების მიღების პროცესში იხელმძღვანელებს საქართველოს კონსტიტუციიის და მის შესახებ საქართველოს საკონსტიტუციო სასამართლოს პრქატიკის, ადამიანის უფლებათა და ძირითად თავისუფლებათა დაცვის ევროპული კონვენციიისა და მის შესახებ პრეცედენტული სამართლის შესაბამისად და არ დააკმაყოფილებს თბილისის მერიის ზედამხედველობის საქალაქო სამსახურის მოთხოვნას, რადგან, GDI-ს განმარტებით, რელიგიური გრძნობებისა და ეროვნული ღირსების დაცვის მოტივით სიტყვის თავისუფლების შემზღუდავი გადაწყვეტილების მიღება ცენზურის სახიფათო პრეცედენტად იქცევა.