საქართველოს პრეზიდენტმა ოკუპირებულ ცხინვალში დარჩენილი მოსახლეობის შესახებ ისაუბრა და აღნიშნა, რომ ისინი აგვისტოს მოვლენების გამო საქართველოს არ ამტყუნებენ. სააკაშვილის თქმით, ეს ინფორმაცია, მას ერთ-ერთმა თანამდებობის პირმა მიაწოდა, თუმცა პრეზიდენტს ინფორმატორის ვინაობა და ეროვნება არ დაუკონკრეტებია. ამის შესახებ პრეზიდენტმა მუხათგვერდის ძმათა სასაფლაოზე განაცხადა, სადაც საქართველოს პატრიარქთან, უწმინდესსა და უნეტარეს ილია მეორესთან ერთად, აგვისტოს ომში დაღუპული ჯარისკაცების ხსოვნას პატივი მიაგო.
"მე მითხრა ერთმა თანამდებობის პირმა, რომ მან დაავალა თავის კონტროლქვეშ დაქვემდებარებულ ჯგუფს, რომ შესწავლა ცხინვალში, რას ფიქრობს იმის მეათედი მოსახლება, რომელიც იქ ადრე იყო. მან მითხრა, რომ ცხინვალში დარჩენილი მოსახლება არ ამტყუნებს საქართველოს და ეს ჩემთვის იყო დიდი აღმოჩენა, რადგან ამას მომავლისთვის დიდ მნიშვნელობა აქვს", - აღნიშნა პრეზიდენტმა.
სააკაშვილის განმარტებით, ყოველივე ამას ისიც მოწმობს, რომ ომის შემდეგ ცხინვალიდან ბევრი ეთნიკურად ოსი ადამიანი საქართველოს სხვა რეგიონებში გადმოვიდნენ.
"მათ ვინც დატოვა ოკუპირებული ტერიტორია, მათი უმრავლესობა იყო ეთნიკური ოსი და წამოვიდნენ საქართველოს სხვა რეგიონებში. ის რომ, ისინი აქეთ წამოვიდნენ იმაზე მეტყველებს, რომ 2008 წლის აგვისტოში არ დაიანხეს საფრთხე, არც ჩვენ ჯარში, არც ჩვენ სახელმწიფოში და უბრალოდ დაინახეს, როგორ თავგანწირულად იბრძოდნენ მათი სიცოცლხის შესანარჩუნებლად", - აღნიშნა სააკაშვილმა.
