ხვალ, 1-ელ აგვისტოს, თიანეთის მუნიციპალიტეტის გამგეობისა და მცხეთა-მთიანეთის სამხარეო ადმინისტრაციის ინიციატივით, დაბა თიანეთში სახალხო დღესასწაული "თიანეთობა 2010" გაიმართება. ღონისძიების მიზანია, რეგიონში ტრადიციების აღდგენა_განვითარება მუსიკალური ფილკლორის, ხალხური პოეზიის, ხალხური სპორტული თამაშების, ხალხური რეწვის, ტრადიციული სამზარეულოსა და საყოფაცხოვრებო საქმიანობის სფეროში. Aასევე, ტურიზმის განვითარება თიანეთის მუნიციპალიტეტში და სხვადასხვა საქველმოქმედო ღონისძიებების მოწყობა.
სახალხო ზეიმში საკუთარი შემოქმედებით წარსდგებიან, როგორც თიანეთის, ასევე დუშეთის, მცხეთისა და ახალგორის მუნიციპალიტეტებიდან მოწვეული სხვადასხვა ფოლკლორული ჯგუფები.
დღესასწაულზე მოხდება ასევე ხალხური რეწვის ნიმუშების გამოფენა-გაყიდვა, სპორტული გასართობი ღონისძიებები_ (ქართული ჭიდაობა, ლახტი, გურგობეა, დოღი, მკლავჭიდი, ხრიდოლი), მოეწყობა კონკურსები ხინკლის ჭამასა და ლუდის სმაში, გამოვლენილი გამარჯვებულები დასაჩუქრდებიან სამახსოვრო ჯილდოებით.
სახალხო ზეიმი დაბა თიანეთის დასასვენებელ პარკში 1-ელ აგვისტოს 12.00 საათზე დაიწყება, რომელსაც ბოლოს საკუთარი შემოქმედებით ანსამბლი "ზუმბალენდი და ჩვენებურები" დაასრულებენ.
