ოსმა სეპარატისტებმა საქართველოს დაკავებული მოქალაქეები გაათავისუფლეს. ეს ადამიანები სეპარატისტებმა 18 ივლისს დააკავეს და მათ ბრალდებად ე.წ. სახელმწიფო საზღვრის უკანონო გადაკვეთის მცდელობა წაუყენეს.
"სამხრეთ ოსეთის სახელმწიფო საზღვრის შესახებ კანონის თანახმად, გაიმართა სასამართლო პროცესი. სასამართლო გადაწყვეტილების მიხედვით მათ გადაიხადეს უმნიშვნელო ადმინისტრაციული ჯარიმა, რის შემდეგაც ისინი გაათავისუფლეს", _ იუწყება ე.წ. სამხრეთ ოსეთის ბეჭდვისა და ინფორმაციის კომიტეტი.
მათივე ინფორმაციით, გათავისუფლებულები ასევე გააფრთხილეს, რომ დარღვევის განმეორების შემთხვევაში მათ სისხლის სამართლის პასუხისმგებლობა დაეკისრებათ.
შეგახსენებთ, რომ 2010 წლის 18 ივლისს სეპარატისტებმა დააკავეს საქართველოს ექვსი მოქალაქე, რომლებიც ე.წ. სამხრე ოსეთიდან ქარელის რაიონში გადასვლად ცდილობდნენ _ ალიკ სამხარაძე, ბესიკ სამხარაძე, ნიკოლოზ კალატოზიშვილი, რამაზ ლაბაძე, იამზე ლაბაძე და ნარგიზა ხომასურიძე. 2010 წლის 19 ივლისს იამზე ლაბაძე და ნარგიზა ხომასურიძე ე.წ. სამხრეთ ოსეთიდან გააძევეს, დანარჩენები კი გაასამართლეს.
