პოლონური ავიაკომპანია "LOT"-ი, რომელიც საქართველოს ბაზარზე შემოდის სულაც არ არის ის "დაბალფასიანი ავიაკომპანია", რომელსაც ვერა ქობალია მინისტრად დანიშვნის შემდეგ ლამის პირველსავე ბრიფინგზე გვპირდებოდა. მინისტრის ეს ინიციატივა ქართულ ავიაკომპანიებში არასერიოზულად აღიქვეს, რადგან მათი თქმით, დაბალბიუჯეტიანი კომპანიები საქართველოში ვერ შემოვა, რადგან დიდი ბაზარი არ არის და მომხმარებლების უმეტესობა სატრანზიტო რეისების მგზავრია.
როგორც საქართველოში ლოტის ოფიციალურმა წარმომადგენელმა "LOT თრეველის" ხელმძღვანელმა გიორგი ლიპარტელიანმა განაცხადა, "LOT"-ი ისეთი ავიაკომპანიაა, რომელიც საკმაოდ დაბალ ტარიფებზე მუშაობს. "LOT"-ი საქართველოს ავიაბაზარზე ოფიციალურად 15 სექტემბრიდან შემოვა და პირველ რეისს ვარშავა-თბილისის მიმართულებით შეასრულებს. ხოლო თბილისიდან ვარშავის მიმართულებით ავიარეისი 16 სექტემბერს შესრულდება.
"LOT"-ი საკმაოდ დაბალი ტარიფებით იფრენს, რაც მნიშვნელოვანია საქართველოში ტურიზმის განვითარებისთვის, რადგან ბევრ პოლონელს მიეცემა საშუალება საქართველოში ჩამოვიდეს და დაათვალიეროს", - განაცხადა ვერა ქობალიამ.
ყველაზე მთავარი კი დაპირებული ბილეთის დაბალი ფასია. ლიპარტელიანის ინფორმაციით, ბილეთის ფასი ერთი მიმართულებით 185 ევროა, ხოლო ორი მიმართულებით 275 ევრო. საინტერესოა, რითაა იაფი პოლონური ავიაკომპანიის ფასი სხვა დანარჩენებზე? აქვე ისიც უნდა აღვნიშნოთ, რომ როდესაც ავიაკომპანია აცხადებს ბილეთის ფასს, მას 100 ევრომდე მოსაკრებლები ემატება, ზოგჯერ მეტიც.
სხვათა შორის, ავიაკომპანიებს კლიენტების მოსაზიდად კიდევ ერთი სარეკლამო ტრიუკი აქვთ, რომელიც ასე ჟღერს _"ავიაბილეთები 185 ევროდან". ეს იმას ნიშნავს, რომ ბილეთის ფასი მოსაკრებლის გარეშე 185 ევროდან იწყება, თუმცა მერწმუნეთ რა დროსაც არ უნდა მოიკითხოთ, "ამ ფასიანი ბილეთი" გაყიდული დაგხვდებათ.
შევადაროთ სხვა ავიაკომპანიების ფასები, რომელიც საქართველოში დაფრინავენ. მაგალითად: "ჩეხეთის ავიახაზები" _ ბილეთის ფასი ერთი გზა 160 ევროდან, ორი გზა - 289 ევრო. "ეარ ბალტიკა" - ერთი გზა 87 ევრო, ორი გზა - 138; "ლუვთანზა" - ორი გზა 249 ევრო.
როგორც ჩანს, "LOT"-ის ფასები ზოგიერთ ავიაკომპანიაზე ძვირია და დაბალი ფასი ნამდვილად არ არის, თუმცა ამას ყველაზე კარგად მომხმარებელი შეაფასებს.
გარდა იმისა, რომ "LOT"-ის ფასები დაბალი არ არის, საქართველოს მოქალაქეებისთვის, რომლებიც ევროპის სხვა ქალაქებში მიდიან და არა პოლონეთში, არასახარბიელო მარშრუტია. თუ მგზავრი საბერძნეთში, ან რომში მიფრინავს, ცხადია სატრანზიტოდ ვარშავას არ გამოიყენებს და უფრო მოხერხებულ რეისს შეარჩევს.
კიდევ ერთი, ქართული კომპანიების საბაზრო წილი უფრო და უფრო მცირდება. თუ საერთაშორისო ბაზრებზე უცხოურ და ადგილობრივ კომპანიებს შორის წილი ადგილობრივის სასარგებლოდ 60-40-ზე ნაწილდება ეს მაჩვენებელი ჩვენთან 20-80-ზეა.
ხომ არ აჯობებდა, ეკონომიკისა და მდგრადი განვითარების სამინისტროს ქართული ავიაკომპანიების საბაზრო წილის გაზრდაზე ეზრუნა და ხელი მათვის შეეწყო. მით უფრო თუ განსაკუთრებულად დაბალ ფასს არც უცხოური კომპანიები გვთავაზობენ. ან სამინისტროს აეროპორტის მოსაკრებლის შემცირებაზე ეზრუნა, რომელიც ზოგჯერ ბილეთის ფას უტოლდება? მით უფრო, რომ იაფი ავიაკომპანიების ნაწილი საქართველოში პოტენციურ ბაზარს ვერ ხედავს, ნაწილს ქვეყანაში შემოსვლა გადაწყვეტილი არ აქვს და ამის შესახებ უკვე განაცხადეს. გაზეთ Financial -ის ინფორმაციით, ევროპის ერთ-ერთ ყველაზე დაბალფასიან ავიაკომპანია "ვიზეარში" აცხადებენ, რომ ახალი მიმართულებებით, მათ შორის საქართველოში ფრენების დაწყებას მიესალმებიან და პოტენციურ გეგმასაც განიხილავენ, თუმცა გადაწყვეტილება მიღებული არ არის. ამასთან, მათი თქმით, მთავარი მოთხოვნა აეროპორტის მოსაკრებლის დაბალი ფასია. "ეარბერლინი", რომელიც ასევე დაბალფასიანია, საქართველოში შემოსვლას არ გეგმავს. მათი განცხადებით, თუ საქართველოში პოტენციურ ბაზარს დაინახავენ, იმ შემთხვევაში შემოვლენ.
ავიაკომპანიის შემოსვლის შესახებ განაცხადი უკვე გაკეთებულია. პირველი რეისიც მალე შესრულდება. მგზავრთა კმაყოფილების შესახებ კი სულ რაღაც ერთიდან ორთვემდე დროა საჭირო. თუმცა მანამდე საჭიროა ავიაკომპანიამ კონკურენციას გაუძლოს. მასზე იაფად ხომ სხვა ავიაკომპანიები დაფრინავენ.
ცნობისთვის, "LOT"-ი პოლნეთის ეროვნული გადამზიდავი ავიაკომპანიაა, რომელიც STAR ALLIANCE-ს წევრია. აქვს შვილობილი კომპანია, EURO LOT, რომელიც პოლონეტის შიდა რეისებს ასრულებს.
ავიაკომპანია ფრენებს მსოფლიოს მასშტაბით 57 მიმართულებით ახორციელებს. აღსანიშნავია, რომ საქართველოსა და პოლონეთს შორის ფრენის ხანგრძლივობა 3 საათი და 40 წუთი იქნება და ავიაკომპანია რეისებს ხუთშაბათს, პარასკევს და კვირას შეასრულებს. პოლონური ავიაკომპანიის გენერალური კომერციული აგენტი საქართველოში იქნება "LOT თრეველი" და ბილეთების გავრცელება და გაყიდვა სწორედ "LOT" თრეველის მეშვეობით მოხდება. "LOT" ივლისიდან რეგულარულ რეისებს ახორციელებს ერევნის მიმართულებითაც.
"ჯი-ეიჩ-ენი", თემურ ჭუმბურიძე