საქართველოს პრეზიდენტმა მიხეილ სააკაშვილმა ქართული გაზეთები "ასავალ-დასავალი", "ალია" და "რაო-რაო" სიბინძურეს შეადარა. ამის შესახებ პრეზიდენტმა თავდაცვის სამინისტროში გამართულ შეხვედრაზე მუხროვანის ამბოხის გახსენებისას განაცხადა.
"თქვენ ნახეთ შარშან რამდენად სწრაფად მოხდა სამხედრო გადატრიალების ლოკალიზება. ამან კარგად დამანახა რა განსხვავება სხვადასხვა შენაერთებსა და სხვადასხვა ოფიცრებს შორის. მახსოვს ამბოხის დროს ჯერ მეოთხე ბრიგადაში ავედი, სადაც ოფიცრის მაგიდაზე სამხედრო ლიტერატურა იდო, ამის შემდე გავედით მუხროვანში, სადაც ისევ ძველი შემადგენლობა იყო და მათი ოფიცრის მაგიდაზე "ალია", "ასავალ-დასავალი" და ათასგვარი სხვა სიბინძურეები, ათასგვარი ბინძური ჭორებით იდო. ერთი ოფიცერი სამხედრო ლიტერატურას კითხულობდა და მეორე კი "ასავალ-დასავალს", გაზეთ "რაო-რასო" და ათას სისულელეს. ნათლად გამოჩნდა ორი მენტალიტეტის დაჯახება, ეს არის ახალი და ძველი საქართველოს დაჯახება და საბედნიეროდ იმ შემთხვევაში ახალმა საქართველომ გამოჩინა თავის ძალა, კბილები და გამბედაობაც და ასე უნდა იყოს ყოველთვის შეიარაღებულ ძალებში", - განაცხადა სააკაშვილმა.
პრეზიდენტის შეფასებით, ქართული შეიარაღებული ძალების საზოგადოების ელიტაა და საქართველოში ყველაზე მეტად ის ადამიანები ფასობენ, ვინც საკუთარი სამშობლოს დასაცავად თავს წირავს.
