ჟენევის საერთაშორისო მოლაპარაკებები ერთადერთი შედეგით - მომავალი შეხვედრის თარიღზე შეთანხმებით დასრულდა. ჟენევის საერთაშორისო მოლაპარაკებათა მორიგი მე-13 რაუნდი 14 ოქტომბერს გაიმართება. განცხადება ამის შესახებ ოს სეპარატისტთა ლიდერის ე.წ. რწმუნებულმა პოსტკოფლიქტური დარეგულირების საკითხებში ბორის ჩოჩიევმა გააკეთა. "მიღებულა გადაწყვეტილება იმის შესახებ, რომ ჟენევის საერთაშორისო მოლაპარაკებათა მორიგი რაუნდი 14 ოქტომბერს გაიმართოს", _ აცხადებს ჩოჩიევი და დასძენს, რომ მოლაპარაკებათა უკვე ჩატარებულ მე-12 რაუნდზე ამერიკული მხარე კვლავ შეგნებულად არიდებდა თავს საქართველოს, ე.წ. სამხრეთ ოსეთსა და აფხაზეთს შორის თავდაუსხმელობის ხელშეკრულების გაფორმების დეტალურ განხილვას. "ყველა პრობლემა რომელიც გასული 12 რაუნდის განმავლობაში წარმოიშვა თანათავმჯდომარეების არაკონსტრუქციული პოზიციის ბრალია. ალბათ მათ ასეთი ამოცანა აქვთ დასახული. ჩვენი, რუსული და აფხაზური მხარის პოზიცია კი მდგომარეობს იმაში, რომ თუ უახლოეს ხანში ამ პროექტს (ძალის გამოუყენებლობის ხელშეკრულებას) არ შევიმუშავებთ, მაშინ გამოსავლის სხვა გზები უნდა ვეძებოთ", _ განაცხადა ჩოჩიევმა. მისი განცხადებით აფხაზეთი და ე.წ. სამხრეთ ოსეთი აპირებს მიმართოს რუსეთისა და საფრანგეთის პრეზიდენტებს და მათ შექმნილი სიტუაციის გადაწყვეტაში დახმარება სთხოვოს.