საქართველოს პრეზიდენტი მიხეილ სააკაშვილი ბიზნესის წარმომადგენლებს მეტი აქტიურობისაკენ მოუწოდებს. პრეზიდენტმა ცოტა ხნის წინ, საქართველოში გამართული სემინარი გაიხსენა, რომელშიც მონაწილეობას ამერიკელი ბიზნესმენებიც იღებდნენ. მისი თქმით, ის უყურადღებობა, რომელიც ქართველმა მეღვინეებმა აღნიშნული სემინარის მიმართ გამოიჩინეს, დაუშვებელია, რადგან აშშ-ის ბაზარი რუსულზე 12- ჯერ დიდია და იმ სემინარზე სწორედ ამ ბაზარზე შეღწევის გზებზე იყო საუბარი. ამის შესახებ საქართველოს პრეზიდენტმა ფინანსთა სამინისტროში სტუმრობისას განაცხადა, სადაც მინისტრ კახა ბაინდურაშვილთან ერთად დეპარტამენტის ხელმძღვანელებიც იმყოფებოდნენ.
"ღვინის მიმართულებით ამერიკის ბაზარი არის 12-ჯერ უფრო დიდი ვიდრე რუსეთის ბაზარი. ჩვენ გავქვს ამხელა ბაზარი და ყველას აქვს კეთილგანწყობა, რომ ჩვენი ღვინო მიიღოს და არცერთი მეღვინე არ დაინტერესდა თუ როგორ არის შესაძლებელი ამ ბაზარზე შესვლის.
არ შეიძლება, რომ სახელმწიფო აპარატი უფრო დახვეწილი იყოს ვიდრე კერძო ბიზნესი. ჩვენ პირველ ადგილზე გავედით ბიზნესის რეგისტრაციის კუთხით. ჩვენ ვამარტივებთ ყველაფერს. ჩვენთან ყველაზე ახლოს არის ესტონეთი და ჩვენ კიდევ ბევრი რამ გვაქვს სასწავლო, თუნდაც ესტონეთისგან ამ ელექტრონული მთავრობის კუთხით. ჩვენ შევძელით ამ ლიგაში შესვლა, მაგრამ დანარჩენი უნდა გააკეთოს კერძო ბიზნესმა და ამ მხრივ მათ სჭირდებათ გამოფხიზლება. მე იმედი მაქვს, რომ ჩვენ გვაქვს უკეთესი განვითარების უნიკალური შესაძლებლობა. ამაში ჩვენ გვჭირდება ყველა სექტორის გააქტიურება მათ შორის კერძო სექტორის", - განაცხადა პრეზიდენტმა და აღნიშნა, რომ ყველაფრის კერძო სექტორზე გადაბრალებაც არ იქნება მართებული და საბაჟოზე მომუშავე ზოგიერთი "შემარცხვენელი" თანამშრომლის ბრალეულობასაც გაუსვა ხაზი:
"თუმცა ჯობია ყველაფერი მარტო მათ არ გადავაბრალოთ და ვიდრე თქვენ სარფის საბაჟოზე გყავთ თანამშრომელი, რომელიც ჩხრეკს ტურისტს. ჩვენ გვყვყავს ძალიან ბევრი კარგი თანამშრომელი, მაგრამ ისეთებიც რომლებიც გვარცხვენს", - აღნიშნა სააკაშვილმა.
