საქართველო ყველა სხვა ქვეყანასთან შედარებით ყველაზე ადვილად გამოდის მსოფლიო ეკონომიკური კრიზისიდან - განაცხადა საქართველოს პრეზიდენტმა მიხეილ სააკაშვილმა დღეს ფინანსთა სამინისტროში გამართული შეხვედრის დროს, სადაც ფინანსთა მინისტრთან ერთად დეპარტამენტის ხელმძღვანელებიც იმყოფებოდნენ.
მისივე თქმით, ეს მოხდა პირველ რიგში იმის, გამო რომ საქართველომ მანამდე ჩაატარა რეფორმები და "საქართველოს აქვს ასე თუ ისე ჩამოყალიბებული სახელმწიფო აპარატი".
"ბევრად უფრო უარესი ვიდრე მე ვისურვებდი რომ გვქონდეს, მაგრამ ყველაზე საუკეთესო პოსტსაბჭოთა სივრცეში. შეიძლება ესტონეთთან იყოს საკამათო. და ეს არის მართლაც ყველა თქვენგანის დამსახურება. ეს არის ყოველდღიური მუშაობა, ყოველდღიური გამოწვევები", _ განაცხადა მიხეილ სააკაშვილმა და აღნიშნა, რომ ძალიან მნიშვნელოვანია, რომ მთელი სახელმწიფო აპარატი ელექტრონულ მმართველობაზე გადადის.
"ეს ნიშნავს იმას რომ პრაქტიკულად დოკუმენტების სიარული აქეთ-იქეთ შეწყდა. ყველა თანამშრომელი ყველა დონეზე იქნება კომპიუტერის ეკრანთან. ეს ნიშნავს იმას რომ გაყალბების სისტემა პრაქტიკულად თითქმის გამოირიცხება. ყველას ეცოდინება რომ იქნება სრულიად გამჭვირვალე სახელმწიფო აპარატი და ძალიან მნიშვნელოვანია, რომ სახელმწიფო აპარატი იყოს სუფთა, გამჭვირვალე და ეფექტური", _ განაცხადა სააკაშვილმა.
ამას გარდა, საქართველოს პრეზიდენტი ასევე აცხადებს, რომ ყოველივე ამის გამო ყველა გადასახადის გადახდა ხდება კომპიუტერით.
"ახალი საგადასახადო კოდექსი, რომელიც მარტივდება და კიდევ ძალიან ბევრი უნდა ვკითხოთ კონკრეტულად ეკონომიკაში დასაქმებულ ხალხს თუ რა არის მათთვის მარტივი რა იქნება ისეთი რაც საშუალებას არ მისცემს ვინმეს ბოროტად გამოაყენებინოს თუნდაც მათი შეცდომა? და მეორე რაც მისცემს საშუალებას რომ მაქსიმალურად თავიდან ავიცილოთ ასეთი შეცდომები და ისინი იყვნენ სახელმწიფოსკენ და საკუთარ ქვეყანასთან და ხალხთან ანგარიშვალდებულნი", _ განაცხადა საქართველოს პრეზიდენტმა.
