ეკონომიკისა და მდგრადი განვითარების მინისტრის ვერა ქობალიას შეფასებით, მსოფლიო ბანკის რეიტინგები ქვეყანაში საინვესტიციო გარემოს გაუმჯობესებისთვის განსაკუთრებით მნიშვნელოვანია.
"ინვესტორები დიდ ყურადღევბბას აქცევენ საინვესტიციო გარემოს რეიტინგებს ამა თუ იმ ქვეყანაში. მათთვის განსაკუთრებით მნიშვნელოვანა მსოფლიო ბანკის რეიტინგი. ჩვენ კი აღნიშულ გამოკითხვაში ერთ-ერთი პირველი ადგილი გვიკავია, რაც იმას ნიშნავს, რომ საქართველოში ბიზნესის კეთება ინვესტორებისთვის ადვილია. ამიტომ აქ ჩამოსულ ინვესორებს ჩვენ ახალი პროექტებით და პაკეტებით უნდა დავხვდეთ", _ განაცხადა ვერა ქობალიამ.
მისივე თქმით, საქართველოს წინსვლა იმანაც განაპირობა, რომ ბიზნესის დაწყება კავკასიის რეგიონის ქვეყნებთან შედარებით სადაც ამისთვის საჭიროა 30-დან 60 დღემე საქართველოში მხოლოდ ერთი დღეა საკმარისი.
შეგახსენებთ, რომ საქართველო, მსოფლიო 87 ქვეყანას შორის, ერთ-ერთი ყველაზე გახსნილი ქვეყანაა პირდაპირი უცხოური ინვესტიციებისთვის. მსოფლიო ბანკის აღნიშნული კვლევის ყველა ინდიკატორით, საქართველო, უცხოური კაპიტალის მიმართ სრულიად ღიაა და არანაირი შეზღუდვა არ არსებობს უცხოური კომპანიის მიმართ.
საქართველოში უცხოური ბიზნესის წამოწყებისთვის კომპანიის დასარეგისტრირებლად იუსტიციის სამინისტროს საჯარო რეესტრს უნდა მიმართონ. საქართველოში მსოფლიოს ქვეყნებიდან ყველაზე სწრაფად ხდება შეზღუდული პასუხისმგებლობის საზოგადოების (შპს) შექმნა. უცხოურ კომპანია არ საჭიროებს დამატებითი დოკუმენტების წარდგენასა და არც იმის დასტურს, რომ უცხოეთში არსებული კომპანიის შვილობილ კომპანიას წარმოადგენს.
კომპანიას შეუძლია „ონლაინ" რეჟიმში, საჯარო რეესტრის ვებგვერდზე შეავსოს რეგისტრაციისათვის საჭირო საბუთები და მიიღოს საიდენტიფიკაციო ნომერი. ქვეყანაში კომპანიებს შეუძლიათ საბანკო ანგარიშები უცხოურ ვალუტაში გახსნან. არ არსებობს მინიმალური კაპიტალის მოთხოვნა, როგორც ადგილობრივი, ასევე, უცხოური კომპანიისათვის.
საქართველოში ბიზნესის წამოწყება კომპანიას ყველაზე მცირე დროში (საწარმოს რეგისტრაცია ერთ დღეშიც არის შესაძლებელი) შეუძლია. აღნიშნული კვლევის მიხედვით, ბიზნესის წამოწყება პოლონეთში საჭიროებს 33 დღეს, რუსეთში - 31 დღეს, საბერძნეთში - 22 დღეს, ბულგარეთში - 20 დღეს, სომხეთში - 18 დღეს, თურქეთში - 8 დღეს. ბიზნესის დაწყების პროცედურები ყველაზე მეტ ხანს, თითქმის 6 თვეზე მეტს მოითხოვს ანგოლასა (263 დღე) და ჰაიტიში (212 დღე). აღსანიშნავია, რომ 4 დღეზე ნაკლებ დროში, მსოფლიოს არც ერთ გამოკვლეულ ქვეყანაში არაა შესაძლებელი ბიზნესის დაწყება.
2008 წელს მიღებული კანონით, ქ. თბილისში, მიწის ფლობასთან დაკავშირებული სარეგისტრაციო საკითხები ძალიან გამარტივდა და დაჩქარდა. მიწის, როგორც იჯარით აღება, ასევე, ყიდვაა შესაძლებელი და ამ კუთხით, არ არსებობს შეზღუდვა მიწის ფართობთან დაკავშირებით. მიწის იჯარით აღებისათვის, საქართველოში, 1 კვირაა საჭირო, მაშინ, როდესაც პოლონეთში აღნიშნული პროცედურა 5 თვეს საჭიროებს. სახელმწიფო საკუთრებაში არსებული მიწის იჯარით გაცემა საქართველოში 50 დღეშია შესაძლებელი, ხოლო ბულგარეთში, თითქმის 1 წლამდე (351 დღე) ხანგრძლივდება.
მსოფლიო ბანკის კვლევა „ინვესტიციები საზღვრებს გარეთ 2010" აანალიზებს პირდაპირ უცხოურ ინვესტიციებს მსოფლიოს 87 ქვეყანაში. კვლევის ინდიკატორები ფოკუსირებულია 4 თემატურ საკითხზე, კერძოდ, თუ როგორ ახერხებს უცხოური კომპანია ამა თუ იმ ქვეყანაში ინვესტირებას, საქმიანობის წამოწყებას, მიწის ფლობასა და ბიზნესთან დაკავშირებული დავების მოგვარებას.
