დღეს, 27 ივლისს, აფხაზეთის სიმღერისა და ცეკვის ანსამბლი და ახალგაზრდული კაპელა უნგრეთში, აკადემიური გუნდების საერთაშორისო კონკურსზე მიემგზავრება. ანსამბლი უნგრეთში კონკურსის საორგანიზაციო კომიტეტმა მიიწვია. მათ თბილისის საერთაშორისო აეროპორტიდან აფხაზეთის განათლებისა და კულტურის მინისტრი დალი ხომერიკი გააცილებს.
საგუნდო მუსიკის საერთაშორისო მშვიდობის კონკურსი, სადაც მსოფლიოს მრავალი ქვეყნის წარმომადგენელი მონაწილეობს, უნგრეთის ქალაქ დებრეცენში 27 ივლისიდან 3 აგვისტოს ჩათვლით გაიმართება.
აფხაზეთის სიმღერისა და ცეკვის სახელმწიფო ანსამბლი, აფხაზეთის ახალგაზრდულ კაპელასთან ერთად, კომპოზიტორ ბელა ბარტოკის სახელობის საერთაშორისო კონკურსში უკვე მეორედ მონაწილეობს. კონკურსში 21-ე საუკუნეში შექმნილი ქართული გუნდური ნაწარმოებები შესრულდება.
ანსამბლი საქართველოში 2 აგვისტოს დაბრუნდება. მათ გამგზავრებას საქართველოს პრეზიდენტის სარეზერვო ფონდი და აფხაზეთის მთავრობა უზრუნველყოფს.
