არც ჩამოვყალიბებულვარ და ჩემი ქმედებები არის ის, რასაც აქამდეც ვაკეთებდი, - ასე უპასუხა საქართველოს პრეზიდენტმა გიორგი მარგველაშვილმა ჟურნალისტის კითხვას, მიიღებს თუ არა ის საპრეზიდენტო არჩევნებში მონაწილეობას.
"მე არც ჩამოვყალიბებულვარ და ჩემი ქმედებები არის ის, რასაც ვაკეთებდი 2016, 2015 და სხვა წინა წლებში - ვემსახურები ჩემს სამშობლოს ისე, როგორც საჭიროდ და სწორად მიმაჩნია. ჩემი ქმედება არის ეს და მათი ქმედება არის - "საპრეზიდენტო კამპანია -შავი პიარი", - განაცხადა გიორგი მარგველშვილმა.
მისი თქმით, ის ამ „დაბნეულ შავ პიარს“ მაინცდამაინც სერიოზულად არ აღიქვამს.
„ნარკორეალიზატორები, მათ შორის არა მხოლოდ საქართველოში რეალიზატორები, არამედ გადმომტანებიც კი არ არიან ამ სიაში მოაზრებული და მე აბსოლუტურად ვიზიარებ იმ პოზიციას, რომ ნარკორეალიზატორების მიმართ პოლიტიკის შემსუბუქება არ იქნება სწორი.
რაც შეეხება წინასაარჩევნო კამპანიას და გაკეთებულ შეფასებებს, ნება მომეცით ცალ-ცალკე არ ვუპასუხო, მაგრამ ჯამში ეს ტოვებს გარკვეული დაბნეულობის შთაბეჭდილებას. მე ვხედავ მთელ ტალღებს და არა მხოლოდ შეწყალების კომისიასთან დაკავშირებით. ჩვენ ვნახეთ შავი პიარის კამპანია შეწყალების კომისიასთან მიმართებაში, შავი პიარის ტალღა ე.წ. სააკაშვილთან გარიგების ნაწილში - ყოველ დღე ჩვენ ვხედავთ ამ წარუმატებელ, შავი პიარის ინიციატივებს, რომელიც ჩემი აზრით, უკავშირდება იმ ფაქტს, რომ „ქართული ოცნების“ პოლიტიკური გუნდი, რომელიც 4 წლის განმავლობაში ებრძოდა საპრეზიდენტო ინსტიტუტს და ცდილობდა საპრეზიდენტო ინსტიტუტის დემონტაჟს, საკუთარ საპრეზიდენტო კანდიდატთან დაკავშირებით ვერ ჩამოყალიბდა - ვერ ვხედავ, რომ ჰქონდეს თავისი ჩამოყალიბებული შეხედულება . ამავე ფონზე, ეტყობა, ჩამოყალიბდა რაღაც ნაწილში პოზიცია, რომ ჩვენ უნდა ვაწარმოოთ შავი პიარი მოქმედი პრეზიდენტის წინააღმდეგ და ყოველდღე ჩვენ გვესმის წარუმატებელი ტალღები. დარწმუნებული ვარ, ანალოგიური, აბსურდული ტალღები მომავალშიც გაგრძელდება, თუმცა სიმართლე გითხრათ, ამ დაბნეულ შავ პიარს მე მაინცდამაინც სერიოზულად არ აღვიქვამ და არც ვფიქრობ, რომ ის ვინმეზე მოქმედებდეს“, - განაცხადა პრეზიდენტმა.
