საქართველოს თავისუფალი სტილით მოჭიდავეთა ახალგაზრდულმა ნაკრებმა 24-25 ივლისს ბუდაპეშტში ჩატარებულ მსოფლიოს ჩემპიონატზე 2 ოქროს, 1 ვერცხლისა და 2 ბრინჯაოს მედალი მოიპოვა. ნუგზარ სხირელის გაწვრთნილი გუნდიდან ყველაზე შედეგიანად ვლადიმერ ხინჩეგაშვილმა (55 კგ) და დავით ხუციშვილმა (74 კგ) იჭიდავეს, სეზონის უმთავრესი შეჯიბრი წაუგებლად ჩაამთავრეს, ყველა შეხვედრა მოიგეს და ოქროს მედლები მოიპოვეს.
შეგახსენებთ, ხუციშვილი ერთი თვის წინ, ბულგარეთში გამართულ ევროპის ჩემპიონატზეც ოქროს მედალს დაეუფლა. ხოლო ხინჩეგაშვილმა მაშინ ფინალში წააგო, აზერბაიჯანელ ტოგრულ ასგაროვთან და მას რევანში მსოფლიოს ჩემპიონატის ფინალში აუღო.
უმსუბუქეს წონაში - 50 კილოგრამში მოჭიდავე ლაშა ტალახაძემ (50 კგ) ევროპულ ბრინჯაოს მსოფლიოს ვერცხლი მიამატა. თენგიზ ჩოჩიშვილს (60 კგ) კი პირიქით, ვერცხლი ჰქონდა და ამჯერად ბრინჯაო დაისაკუთრა. ცნობისთვის, ტალახაძემ და ჩოჩიშვილმა ახალგაზრდული ნაკრების სახელით ამ რანგის შეჯიბრებზე წლეულს პირველად იჭიდავეს.
ევროპის მოქმედმა ჩემპიონმა, მძიმეწონოსანმა გიორგი საკანდელიძემ (120 კგ) ბუდაპეშტში ოქრო-ვერცხლის შანსი მეოთხედფინალში დაკარგა. რეპეშაჟში გადართულმა კი ორი მეტოქე დაამარცხა და ბრინჯაოს პრიზიორი გახდა.
სამეულს მიღმა მხოლოდ 3 ქართველი დარჩა. დავით მარსაგიშვილმა (84 კგ) და თორნიკე ხიდეშელმა (96 კგ) მსოფლიოს პირველობაზე მხოლოდ თითო შეხვედრა ჩაატარეს. დავით ტლაშაძე (66 კგ) კი ძირითად ბადეს მეოთხედფინალიდან დაემშვიდობა.
საერთო გუნდურ ჩათვლაში საქართველოს ახალგაზრდულმა ნაკრებმა 49 ქულა დააგროვა და მესამე ადგილი დაიკავა. თუმც საინტერესოა, რომ მეორეადგილოსნის - 50-ქულიანი აზერბაიჯანის ნაკრების არც ერთ წარმომადგენელს ოქროს მედალი არ მოუპოვებია.
