„გუშინ გავრცელებული ინფორმაციის არცერთი პუნქტი სიმართლეს არ შეესაბამება“, - ამის შესახებ განცხადება შრომის, ჯანმრთელობისა და სოციალური დაცვის მინისტრმა, დავით სერგეენკომ ანტირაბიული ვაქცინის შესახებ სპეციალურად გამართულ ბრიფინგზე, რამდენიმე წუთის წინ გააკეთა.
მინისტრის განმარტებით, ცოფის ვაქცინა, რომლის ბაზარზე დაშვების უფლებაზე და ჯანმრთელობისთვის საფრთხისშემცველობაზე იყო საუბარი, იყო 2015 წელს რეგისტრირებული და ასევე ჯანდაცვის მსოფლიო ორგანიზაციის მიერ პრეკვალიფიცირებული.
სერგეენკომ, ასევე, განაცხადა, რომ აღნიშნული ვაქცინა ბავშვთა გეგმიურ ვაქცინაციასთან კავშირში არ არის.
„თუ მსოფლიო ჯანდაცვის ორგანიზაცია მედიკამენტს თუ ვაქცინას პრეკვალიფიკაციას მოუხსნის, ეს არ ნიშნავს, რომ მედიკამენტი არარეგისტრირებულია ან საფრთხეს წარმოადგენს. შარშან, 11 თებერვალს, როგორც კი მოგვივიდა ეს შეტყობინება, მოქმედების ალგორითმი იყო ასეთი -ა ნ საერთოდ შეგვეწყვიტა ცოფის ვაქცინაცია, სანამ ახალს არ შემოვიტანდით, ამას დაგვეცადა თვენახევარი, ამ პერიოდის განმავლობაში, უბრალოდ ცოფით გარდაიცვლებოდა რამდენიმე ადამიანი ან გაგვეგრძელებინა არსებული ვაქცინაცია, ან გვეზრუნა ჩანაცვლებაზე.
ჩვენ ვიზრუნეთ ჩანაცვლებაზე, რასაც დასჭირდა 5 კვირა და 20 მარტიდან ახალი ვაქცინით ვაგრძელებთ. თუმცა, იმ პერიოდში არც ერთი გართულება ამ ვაქცინას არ ჰქონია და უფრო მეტიც - ბოლო 30 წლის განმავლობაში, პირველად ჩვენს ქვეყანაში - ზედიზედ 3 წელი, არც ერთი ადამიანი, გარდაცვლილა ცოფით და სწორედ ამ ვაქცინაციის და იმუნიზაციის პროგრამის დამსახურებით, მაშინ როცა მანამდე ცოფით სიკვდილიანობის მაჩვენებელი წელიწადში საშუალოდ 5-6 ადამიანი იყო", - განაცხადა დავით სერგეენკომ.
ამავდროულად, მინისტრმა მედიას მიმართა, რომ სასურველია, მსგავს სენსიტიურ თემებზე გზავნილები უფრო მოზომილი იყოს.
„ვთხოვ მედიას, როდესაც ასეთ თემებზეა საუბარი, გზავნილები იყოს ძალიან მოზომილი. საქართველოში წითელას აფეთქების დროს, ერთი სიუჟეტის გამო, რომელიც იმუნიზაცია-ვაქცინაციის დისკრედიტაციას ეძღვნებოდა, საზოგადოებამ უარი თქვა ვაქცინაციაზე და ათასობით ადამიანი დაინფიცირდა წითელათი, აქედან 4 გარდაიცვალა.
საზოგადოებას კი მივმართავ, ნუ აიცრუებენ გულს ვაქცინაციაზე, რადგან მსოფლიო მედიცინაში გადამდებ დაავადებებთან ბრძოლის საუკეთესო საშუალება არის იმუნიზაცია. ასევე, ყველა ვაქცინა, რომელიც ამ დროისთვის გამოიყენება საქართველოში, არის მაღალი ხარისხის, ეფექტური და უსაფრთხო“, - განმარტა ჯანდაცვის მინისტრმა.
შეგახსენებთ, აუდიტის სამსახურის ოფიციალურ გვერდზე გავრცელდა ინფორმაცია იმუნიზაციის პროგრამის ფარგლებში, საქართველოში 29 222 დოზის ოდენობით ჯანმრთელობისთვის საფრთხის შემცველი ვაქცინის გახარჯვის შესახებ.
ჯანდაცვის სამინისტროს პასუხის შემდეგ კი აუდიტის სამსახურში განმარტეს:
"2018 წლის აუდიტის გეგმის გამოქვეყნების შემდეგ სახელმწიფო აუდიტის სამსახურსა და სამინისტროს შორის შედგა სამუშაო შეხვედრა, სადაც სამინისტროს მხრიდან წარმოადგენილი იქნა სხვადასხვა არგუმენტები და მტკიცებულებები, მათ შორის, ცოფის საწინააღმდეგო ვაქცინის ხარისხის შესახებ.
სახელმწიფო აუდიტის სამსახური ეჭვის ქვეშ არ აყენებს სახელმწიფო იმუნიზაციის პროგრამას, მათ შორის ცოფის საწინააღმდეგო ვაქცინაციის ნაწილში".
