რუსეთის ფედერაციის საბჭოში მიიჩნევენ, რომ გაეროს საერთაშორისო სასამართლოს მიერ გამოტანილი გადაწყვეტილება, რომელმაც კოსოვოს მიერ საკუთარი დამოუკიდებლობის ცალმხრივად გამოცხადება ლეგიტიმურად აღიარა, საშუალებას აძლევს მსოფლიო თანამეგობრობას სხვანაირად შეხედონ აფხაზეთისა და ე.წ. სამხრეთ ოსეთის დამოუკიდებლობას.

რუსეთის ფედერაციის საბჭოს თავდაცვისა და უშიშროების კომიტეტის თავმჯდომარე ვიქტორ ოზეროვი აცხადებს, რომ "სასამართლო გადაწყვეტილება სასამართლო გადაწყვეტილებაა და იგი შეფასებებს არ ექვემდებარება". ამასთან ერთად ოზეროვი ასევე აღნიშნავს, რომ "იგი არის კიდევ ერთი სერიოზული დადასტურება აფხაზეთისა და სამხრეთ ოსეთის მიერ სუვერენიტეტის გამოცხადების სასარგებლოდ".

"ამ რესპუბლიკებს საქართველოდან გამოყოფისათვის იმაზე ნაკლები მიზეზი როდი ჰქონდათ ვიდრე კოსოვოს როდესაც სერბეთს ეყოფოდა. სასამართლოს გადაწყვეტილება საშუალებას აძლევს პოლიტიკოსებსა და მსოფლიო საზოგადოებას სხვანაირად შეხედონ კავკასიური რესპუბლიკების სუვერენიტეტს", _ აცხადებს ოზეროვი.

ხოლო რუსეთის ფედერაციის საბჭოს პირველი ვიცე-სპიკერი აცხადებს, რომ გაეროს საერთაშორისო სასამართლო კოსოვოს დამოუკიდებლობის ლეგიტიმურობის შესახებ ქმნის საშიშ პრეცედენტს.

"გაეროს სასამართლოს არ აქვს არავითარი მორალური უფლება ასეთი საკითხები განიხილოს. გადაწყვეტილება, რომელიც მის მიერაა მიღებული კოსოვოსთან მიმართებაში ქმნის საშიშ პრეცედენტს", _ აცხადებს ტორშინი.

მისი თქმით, მან კარგად იცის კოსოვოში არსებული სიტუაცია და სწორედ ამავე სასამართლოს ნებართვით ცდებოდა ყოფილი იუგოსლავიის და სერბეთის ბომბვა და სწორედ მისი წაქეზებით კოსოვოელი ბანდიტები ანადგურებდნენ მშვიდობიან მოსახლეობას და ანგრევდნენ ტაძრებს", _ განაცხადა ტორშინმა.

ამასთან ერთად ტორშინი ასევე აცხადებს, რომ ეს გადაწყვეტილება ბადებს კითხვას _ რატომ შეიძლება კოსოვოსათვის და რატომ არ შეიძლება აფხაზეთისა და სამხრეთ ოსეთისათვის?"
"რუსეთმა და იმ ქვეყნებმა, რომლებმაც აღიარეს აფხაზეთისა და სამხრეთ ოსეთის დამოუკიდებლობა ამ სიტუაციაში ამ რესპუბლიკებთან ურთიერობები უნდა გაამყარონ. თუკი კოსოვო გატენილია უცხო ქვეყნის ჯარებით, არაა საჭირო რუსეთისკენ თითის გაშვება, რომელმაც განათავსა თავისი სამხედრო ბაზები აფხაზეთისა და სამხრეთ ოსეთის ტერიტორიაზე", _ აცხადებს ტორშინი.

აღსანიშნავია,¸რომ გაეროს საერთაშორისო სასამართლოს მიერ გამოტანილი განაჩენის მიხედვით, რომელიც კოსოვოს დამოუკიდებლობის ცალმხრივად აღიარების კანონიერებას ეხება _ "სერბეთის პრეტენზია უსაფუძვლოა" და კოსოვოს დამოუკიდებლობის აღიარება კანონის ფარგლებში მოხდა.

აღნიშნული დასკვნას მხოლოდ რეკომენდაციის სახე აქვს და განაჩენს არ წარმოადგენს. გენერალურ ასამბლეას თავად მოუწევს საბოლოო გადაწყვეტილების მიღება სერბეთის სარჩელთან დაკავშირებით. შეგახსენებთ, რომ 2008 წლის თებერვალში კოსოველმა ალბანელებმა სერბეთისგან დამოუკიდებლობა გამოაცხადეს. კოსოვოს დამოუკიდებლობა უკვე 70-მა სახელმწიფომ აღიარა. წელიწადნახევრის წინ გაეროს გენერალურმა ასამბლეამ სერბეთის ინიციატივით აღნიშნული საკითხი განსახილველად საერთაშორისო სასამართლოს გადასცა.