დღეს, 23 ივლისს, თბილისის საქალაქო სასამართლოში ტელეკომპანია "კავკასიაში" მომხდარ ინციდენტთან დაკავშირებით პროცესზე დავით აქუბარდიას დაკითხავენ.
დღესვე, აქუბარდიასთან ერთად დაზარალებულის სტატუსით, ტელეკომპანიის კიდევ ერთი წარმომადგენელი გიორგი გეგეჭკორი დაიკითხება, რითაც ბრალდების მხარის მოწმეებისა და დაზარალებულების დაკითხვა დასრულდება.
გუშინდელ სასამართლო პროცესზე კი თეოლოგი ბექა მინდიაშვილი და ილიას უნივერსიტეტის ორი თანამშრომელი სერგო რატიანი და ზაზა ბასილია დაიკითხნენ.
შეგახსენებთ, რომ შოთა აფხაიძეს, რატი მაისურაძეს, ლევან ჩაჩუას, გიორგი გაბედავას, დავით შალამბერიძეს, ავთანდილ ზუმბაძეს, ზვიად ბლიაძეს და ჯაბა გურჩიანს ბრალი ედებათ ჟურნალისტის პროფესიულ საქმიანობაში უკანონოდ ხელის შეშლაში, რაც 2 წლამდე პატიმრობას ითვალისწინებს და ხულიგნობაში, რაც 5 წლამდე პატიმრობას ითვალისწინებს.
ტელეკომპანია "კავკასიაში" ინციდენტი 7 მაისს მოხდა.
