თემირლან მაჩალიკაშვილის მამა წმინდა მიქაელ მთავარანგელოზის სახელობის კლინიკისთვის ქველმოქმედებას გეგმავს. მალხაზ მაჩალიკაშვილმა ჟურნალისტებთან ასევე განაცხადა, რომ სახელმწიფოს, მისი შვილის გადასაყვანად, შერჩეული აქვს სამი ევროპული კლინიკა.
„ეს ამბავი როგორ ჩაივლის და რა იქნება, არ ვიცი, ჩემი შვილი გადარჩება თუ არა, ეს ღმერთმა იცის. მე ამ კლინიკაში ჩემს წვლილს შევიტან, ვგულისხმობ ქველმოქმედებას. მე იმდენად მადლიერი ვარ ამ კლინიკის, რაც შეუძლიათ გააკეთეს. რაც შეეხება გადაყვანას, თვითონ სახელმწიფოს ჰყავს შერჩეული სამი კლინიკა ისრაელში, ავსტრიასა და გერმანიაში და ჩემი სანათესაოც მუშაობს სხვა კლინიკებზე. ამის მერე მოხდება კლინიკის არჩევა“, - განაცხადა მალხაზ მაჩალიკაშვილმა.
რაც შეეხება ხარჯების ანაზღაურებას, მალხაზ მაჩალიკაშვილმა განაცხადა, რომ ”ალბათ სახელმწიფო ანაზღაურებს”.
რაც შეეხება მისი შვილის საქმეს, მაჩალიკაშვილის თქმით, ის სიმართლის დასადგენად სტრასბურგამდეც მივა.
„მოვითხოვ ყველანაირ ექსპერტიზას, რომ სიმართლე დაადგინონ. მე ამას სტრასბურგამდე მივიყვან და სიმართლეს დავადგენ. ჩემთვის მნიშვნელოვანია სიმართლე დადგინდეს. ჩემს შვილსაც ექნებოდა ბევრი შეკითხვა, მაგრამ უმისამართო ტყვიამ დაადუმა. ვცდილობ, რომ მის შეკითხვებს გავცე პასუხი“, - განაცხადა მაჩალიკაშვილმა.
