მიხეილ სააკაშვილის საქმის პროკურორმა, ირაკლი ნადარეიშვილმა დაცვის მხარის დასკვნით სიტყვას საკონსტიტუციო სამართლის შესახებ ლექცია უწოდა.
“დაცვის მხარემ ყველა მოწმე, რომელიც ბრალდების მიერ დაკითხულ იქნა, იმ ასპექტით გამოიყვანა, რომ თითქოს თითოეულ მათგანს პირადი მტრობა ჰქონდა ბრალდებულ მიხეილ სააკაშვილთან და სწორედ ამის გამო იძლეოდნენ ასეთ ჩვენებებს, შესაბამისად, მათი სანდოობის ხარისხი მაღალი არ იყო და გამამართლებელი განაჩენი უნდა გამოსულიყო. პარალელურად, დაცვის მხარე თავის ერთადერთ მოწმეზე, დათა ახალაიაზე აპელირებდა, რომლის ჩვენებითაც თითქოსდა ბათილდებოდა ბრალდების ყველა ყველა პირდაპირი თუ ირიბი მტკიცებულება. დაცვის მხარეს რატომღაც გამორჩა დათა ახალაიას სანდოობის ფაქტორიც, ის ამ საქმეზე თავად არის ბრალდებული, შესაბამისად ის სიმართლის მღაღადებლად ვერ შეირაცხება, ეს ადამიანი უშუალოდ არის დაინტერესებული აღნიშნული საქმით, შესაბამისად, ვერანაირად ვერ იქნება ობიექტური.
რაც შეეხება დაცვის მხარის პრეტენზიას თუ რატომ ვერ მოხდა შემდეგი პირების: თოფუირიძის, ალანიას, ახალაიას დაკითხვა, საზოგადოებას შევახსენებ, რომ ეს პირები არიან ძებნილები და თითოეულ მათგანზე დამდგარია გამამტყუნებელი განაჩენი, შესაბამისად, ძებნილი პირების დაკითხვის მოთხოვნა პროკურატურის მიმართ არანაირ ლოგიკაში ჯდება“, - განაცხადა ირაკლი ნადარეიშვილმა.
მისივე განმარტებით, სასამართლომ გამამტყუნებელი განაჩენი უდნა გამოიტანოს, რადგან საქმეში სააკაშვილის წინააღმდეგ არაერთი მტკიცებულება არსებობს:
„დაცვის მხარის ვერცერთი სამართლებრივ არგუმენტი ვერ მოვისმინე, გარდა იმისა, რომ ყველაფერზე აპელირებდა, რომ ის იყო პოლიტიკური დევნა და მოწმეები სანდო არ იყვნენ. ეს არ არის სამართლებრივი არგუმენტი, ეს უდნა იყოს კონკრეტული ფაქტებით და მტკიცებულებებით განმტკიცებული, შესაბამისად, დაცვის მხარის სიტყვის მოსმენის შემდეგ მოლოდინი მაქვს, რომ საქმეზე გამამტყუნებელი განაჩენი დადგება“, - განაცხადა ნადარეიშვილმა, რომელიც სასამართლო დარბაზიდან გამოსვლის შემდეგ მიხეილ სააკაშვილის მხარდამჭერებმა შეძახილების ფონზე გააცილეს.
შეგახსენებთ, რომ სახელმწიფო ბრალდება საქართველოს ყოფილ პრეზიდენტს სანდრო გირგვლიანის მკვლელობის საქმის ერთ-ერთ ეპიზოდზე უფლებამოსილების ბოროტად გამოყენებას ედავება.
თუ როდის გამოაცხადებს მოსამართლე აღნიშნულ საქმეზე განაჩენს, ეს მოგვიანებით გახდება ცნობილი.