მოსამართლე ლირიკოსი შემხვდა - ასე შეაფასა პოეტმა ზვიად რატიანმა მისთვის ადმინისტრაციული ჯარიმის შეფარდებაზე მოსამართლის განმარტება.
როგორც რატიანი აცხადებს, თბილისის საქალაქო სასამართლოს გადაწყვეტილებას გაასაჩივრებს.
„ადვოკატებმა გადაწყვიტეს, რომ გამოტანილი სასჯელი აცდენილია იმისგან, რაც შეიძლება სასამართლოს დაედგინა“, - დასძინა ზვიად რატიანმა.
შეგახსენებთ, რომ თბილისის საქალაქო სასამართლომ დღეს ზვიად რატიანი დამანაშავედ ცნო და 2 000 ლარიანი ჯარიმა დააკისრა. როგორც მოსამართლე ქეთევან მინაშვილმა განმარტა, რატიანს პატიმრობა ახალი წლის გამო არ შეუფარდა.
„ბატონო ზვიად, მინდა განგიმარტოთ, რომ ასეთი გადაწყვეტილება სასამართლომ საახალწლო დღეების გამო მიიღო, წინააღმდეგ შემთხვევაში ბრალი ადმინისტრაციულ პატიმრობას ითვალისწინებდა“, - განაცხადა მოსამართლემ.
ზვიად რატიანი 24 დეკემბერს, სამართალდამცავებმა თამარ მეფის გამზირზე დააკავეს. მას ადმინისტრაციულ სამართალდარღვევათა კოდექსის 116-ე და 173-ე მუხლების დარღვევაში ედება ბრალი. რაც წვრილმან ხულიგნობასა და პოლიციისთვის დაუმორჩილებლობას გულისხმობს.
