"საზოგადოებრივი მაუწყებლის ევროპის ბიურო კი არ იხურება, არამედ ძლიერდება,"- ეს განცხადება საზოგადოებრივი მაუწყებლის დირექტორმა ვასილ ვაღლაფერიძემ სამეურვეო საბჭოს სხდომაზე გააკეთა.
საბჭოს სხდომაზე ბორდის წევრების ნაწილი არხის ევროპის ბიუროს დახურვაზე გავრცელებული ინფორმაციით დაინტერესდა. მაღლაფერიძის თქმით, ტერმინი ბიუროს დახურვა არასწორია, რადგან ახლა საერთაშორისო ამბებს არა ერთი, არამედ რამდენიმე ჟურნალისტი გააშუქებს თემატიკის მიხედვით.
ამ გადაწყვეტილებას ეწინააღმდეგება სამეურვეო საბჭოს წევრი სულხან სალაძე. "ჩემთვის ზღვარი გადის აქ. თუ ბრიუსელის ბიურო არ იქნება, მე მხარს არ დავუჭერ ბიუჯეტს, თუ იქნება ვიფიქრებ"- განაცხადა სალაძემ. ბორდის წევრების შეფასებით, ევროპის ბიუროს დახურვა პოლიტიკურად არასწორი მესიჯია, ისინი ხარჯების გაზრდის შესახებაც საუბრობენ.
საზოგადოებრივი მაუწყებლის ბორდის სხდომაზე მაუწყებლის 2018 წლის ბიუჯეტს განიხილავენ.
საზოგადოებრივი მაუწყებელი ევროპის ბიუროს მოსალოდნელი დახურვის შესახებ ინფორმაცია ჟურნალისტმა ქეთევან ქარდავამ facebook-ის პირად გვერდზე გაავრცელა
,,არხის ხელმძღვანელობის გადაწყვეტილებით, 2018 წლის 1 თებერვლიდან საზ. მაუწყებლის ევროპის ბიურო იხურება. მიზეზად მენეჯმენტი ფინანსებს ასახელებს. არხის ხელძღვანელობა ფიქრობს, რომ თბილისიდან უფრო იაფია და ნაკლებ ხარჯებთან არის დაკავშირებული ევროპაში ნატოზე და ევროკავშირზე სიუჟეტების მომზადება, ვიზიტების გაშუქება, ვიდრე ევროპის პოლიტიკური ცენტრიდან ევროპის სხვა ქალაქებში გადასვლა", - წერს ქარდავა.
