სოფელ სკრის დევნილთა დასახლებაში სადრენაჟო სამუშაოები დღეს დაიწყო. მოძველებული სარწყავი სისტემებისა და გახშირებული წვიმის გამო, მოსახლეობის ნაწილს წყლის გუბეები აწუხებდა და ტერიტორია იტბორებოდა. პროექტის განხორციელების შედეგად, კოლექტიურ ცენტრში წვიმის შედეგად წყლის დაგროვების პრობლემა არ იქნება და ნიადაგი გამოშრება.
აღნიშნულთან დაკავშირებით ლტოლვილთა და განსახლების სამინისტრომ, შიდა ქართლში პრეზიდენტის რწმუნებულმა, გაეროს ბავშვთა ფონდისა და მაშველთა საერთაშორისო კომიტეტის წარმომადგენელმა ურთიერთგაგების მემორანდუმს ხელი 4 ივნისს მოაწერეს. მემორანდუმი ეხება სკრისა და მოხისის იძულებით გადაადგილებულ პირთა კოლექტიურ ცენტრებში წყლის მილების რეაბილიტაციასა და წყალგაყვანილობის პრობლემის მოგვარებას.
„სკრაში დაზიანებული იყო ძველი სადრენაჟო სისტემა. მთლიანად აღვადგენთ და ის მითი დაინგრევა, რომ ხალხი ჭაობში ცხოვრობს. ეს ჭაობიანი ადგილი ნამდვილად არ არის. არხი იყო დაზიანებული და გასაწმენდი. უახლოეს თვენახევარში სისტემა მთლიანად გაიწმინდება და ეს ხალხი დაისვენებს. 86 ოჯახიდან დაახლოებით 20-25 ოჯახისს ეზო იტბორებოდა. სამუშაოს დასრულების შემდეგ, ეს პრობლემა მოიხსნება" - აღნიშნა მინისტრმა კობა სუბელიანმა დევნილებთან შეხვედრისას.
დევნილების თქმით კი გარკვეულ სამუშაოებს თავადაც ასრულებენ, რაშიც ანაზღაურებას ღებულოებენ. სონია ეპიტაშვილი, დევნილი: „მოძველებული სისტემის გამო პატარა წვიმის შემდეგაც კი ბაღი იტბორებოდა და მოსავალი თითქმის ვერ მოგვყავდა. კარგია, ახალი სისტემა კეთდება. კმაყოფილები ვიქნებით, წვიმის დროს ბაღებში წყალი არ ჩადგება და მოსავალი არ გაგვიუჭდება."
მემორანდუმის ხელმოწერა და შიდა ქართლში წყლისა და სანიტარულ-ჰიგიენური პირობების გაუმჯობესება შესაძლებელი გახდა შვედეთის საერთაშორისო განვითარების სააგენტოს მიერ დაფინანსებული პროექტის ფარგლებში, რომელიც საქართველოში ერთი წელია ხორციელდება და მიზნად ისახავს რეგიონში წყლისა და სანიტარულ-ჰიგიენური პირობების გაუმჯობესებას.
ობიექტების ტექნიკური შეფასება შიდა ქართლის რეგიონალური სამსახურების მიერ მოხდება. სარეკონსტრუქციო სამუშაოები კი გაეროს ბავშვთა ფონდისა და ხსნის საერთაშორისო კომიტეტის მიერ განხორციელდება.
