თბილისის სააპელაციო სასამართლომ მსახიობ გია როინიშვილის სარჩელი სრულად დააკმაყოფილა. ამის შესახებ „ჯი-ეიჩ-ენს“ გია როინიშვილმა განუცხადა.
„სააპელაციო სასამართლომ საქალაქო სასამართლოს გადაწყვეტილება ძალაში დატოვა, რომელიც ჩემი სარჩელის სრულად დაკმაყოფილებას ითვალისწინებს. საქმე იმდენად მყარი იყო, ამ გადაწყვეტილების მოლოდინი ნამდვილად მქონდა, თუმცა, მაინც გამიხარდა, რომ სიმართლემ იზეიმა და სამართლებრივადაც მართალი ვყოფილვარ.
ეს საქმე თითქმის 3 წლის განმავლობაში მიმდინარეობდა. თეატრიდან ჩემი გაშვება 2014 წლის 31 დეკემბრით თარიღდება. სასამართლომ თეატრში აღმადგინა და განაცდურის ანაზღაურებაც მოხდება, რასაც თეატრთან მოლაპარაკებით გადავწყვეტ“, - აცხადებს როინიშვილი.
ის თეატრში მას შემდეგ გამოცხადდება, რაც სასამართლოს გადაწყვეტილებას ჩაიბარებს.
„დაახლოებით, 1 თვეში სასამართლოს გადაწყვეტილებას ჩავიბარებ. ამის შემდეგ, სამხატვრო ხელმძღვანელთან და ჩემს კოლეგებთან ერთად გავაწყვეტ როგორ ვიმოქმედო“, განაცხადა მსახიობმა.
შეგახსენებთ, რომ გია როინიშვილი მიხეილ თუმანიშვილის სახელობის კინომსახიობთა თეატრიდან 2014 წელს გაუშვეს. მას მაშინდელმა სამხატვრო ხელმძღვანელმა, ქეთი დოლიძემ ხელშეკრულება აღარ გაუგრძელა. მაშინ დოლიძე აცხადებდა, რომ როინიშვილი თეატრში არ დადიოდა.
