"ბრალდების მხარის მოწმე, კრიმინალური პოლიციის ყოფილი თანამშრომელი დაადასტურებს, რომ შემთხვევის ადგილზე მისული პირები, რომელთაც ჩხრეკა ჩაუტარეს, უკვე დაკავებულები იყვნენ", - ამის შესახებ ბუტა რობაქიძის მკვლელობისას, შსს-ს მაღალჩინოსნების მიერ უფლებამოსილების ბოროტად გამოყენების საქმის პროკურორმა, გიორგი ოსიძემ ჟურნალისტებს სასამართლო სხდომის დაწყებამდე განუცხადა.
მისივე თქმით, მეორე მოწმე - მემონტაჟე ისაუბრებს, რა ვითარებაში, როგორ ხდებოდა სიუჟეტების მომზადება.
"დღევანდელ სასამართლო სხდომაზე იგეგმება ბრალდების 2 მოწმის დაკითხვა, მათ შორის ერთ-ერთია კრიმინალური პოლიციის ყოფილი თანამშრომელი, ხოლო მეორე მოწმე გადაცემა "პატრულის" მემონტაჟე. კრიმინალური პოლიციის ყოფილი თანამშრომელი დაადასტურებს იმ გარემოებას, რომ შემთხვევის ადგილზე მისული პირები, რომელთაც ჩხრეკა ჩაუტარეს უკვე დაკავებულები იყვნენ. საქმის მასალების მიხედვით კი, დაკავების ოქმი მანამდეა შევსებული. მემონტაჟე ისაუბრებს თუ რა ვითარებაში, როგორ ხდებოდა სიუჟეტების მომზადება", - განმარტა გიორგი ოსაძემ.
შეგახსენებთ, რომ პროკურატურამ აღნიშნულ საქმეზე ბრალი 5 პირს – გურამ დონაძეს, ირაკლი ფირცხალავას, ზაზა ბაქრაძეს, დავით იაშვილსა და ზურა მიქაძეს წაუყენა.
