დრო არის დავსვათ შეკითხვები, რამდენად გამართლებულია, რამდენად ეფექტურია, რამდენად თანაზომიერია ადამიანის უფლებებში ჩარევის ის მეთოდი, რაც უკავშირდება საპოლიციო კონტროლს, - ამის შესახებ საქართველოს სახალხო დამცველმა, ნინო ლომჯარიამ საქართველოში ჩატარებული საპოლიციო კონტროლის შეფასებისას განაცხადა.
როგორც ლომჯარიამ „რუსთავი 2“-ის გადაცემა „არჩევანში“ აღნიშნა, საპოლიციო კონტროლის გამოცხადებამდე მოქალაქეებს უმჯობესი იქნება თუ მათი უფლება-მოვალეობების შესახებ მიაწვდიან ინფორმაციას.
„დადასტურდა, რომ მრავალი ათასი ადამიანი იქნა შემოწმებული. ნებისმიერ დროს ეს შემოწმება შეიძლება, გადაიზარდოს ისეთ საპროცესო მოქმედებებში, რაც უკავშირდება პირის ჩხრეკას, პირის დაკავებას და აქ უკვე ძალიან მნიშვნელოვანია, რომ იყოს მოქალაქეების, ადამიანის უფლებები დაცული“, - განაცხადა ნინო ლომჯარიამ, რომელმაც აქვე აღნიშნა, რომ სამართალდამცავი სისტემა რეფორმირებას საჭიროებს და ამ ეტაპზე პასუხისმგებელმა ორგანოებმა შესაძლო გადაცდომები უნდა აკონტროლონ.
„დღევანდელი სისტემა, ვფიქრობ, რომ ნამდვილად ვერ უზრუნველყოფს მსგავსი ტიპის დარღვევების ეფექტურ და ეფექტიან გამოძიებას", - დასძინა ნინო ლომჯარიამ.