„ადვოკატები თავიანთ განმარტებებში თავისუფლები არიან, მაგრამ არასწორი აზრია, რომ ოთარ აბესაძე „ქართული ოცნების“ წევრობისთვის ისჯება. „ოცნებაში“ უამარავი ადამიანი ვართ, ოთარისთვის კარგის მეტი არაფერი გამიკეთებია და რატომ უნდა ვებრძოდე მას? პირიქით, გათავისუფლებას ვუსურვებ“, - განუცხადა „ჯი-ეიჩ-ენს“ „ქართული ოცნების“ წევრმა, ზაქარია ქუცნაშვილმა.
მისთვის ადვოკატ ირმა ჭკადუას განცხადება, რომ ოთარ აბესაძე „ქართული ოცნების“ წევრობისთვის ისჯება, ზოგადი ნათქვამია და მისგან მეტ კონკრეტულობას ითხოვს.
„ბრალდება არ შეიძლება აბსტრაქტული იყოს, უნდა დააკონკრეტონ თუ ვის გულისხმობენ. ვიღაც ებრძვის - ეს ძალიან ზოგადი ნათქვამია... პროკურატურამ ოფიციალური განცხადება გაავრცელა, რომ ექსპერტიზის დასკვნაში აბესაძის ჯანმრთელობის მდგომარეობის სირთულეზე საუბარი არ არის. თუმცა, ვიმეორებ, მხარს ვუჭერ და მინდა, რომ ოთარი რაც შეიძლება მალე გათავისუფლდეს, მე მას ვიცნობ და მის პიროვნებაზე კარგის მეტს ვერაფერს გეტყვით“, - აცხადებს ქუცნაშვილი.
დღეს, თბილისის საქალაქო სასამართლომ ოთარ აბესაძე კვლავ პატიმრობაში დატოვა. მოსამართლე ნინო ნაჭყებიამ მხარის შუამდგომლობა, რომ მას აღკვეთის ღონისძიების სახით შეფარდებული პატიმრობა შეცვლოდა, არ დააკმაყოფილა, რადგან მისივე განმარტებით, აბესაძემ შესაძლოა მოწმეებზე ზემოქმედება მოახდინოს.
აბესაძე დღეს ჯერ, სასამართლოს დარბაზში, შემდეგ კი, სასჯელაღსრულების დაწესებულებაში გახდა შეუძლოდ. ადვოკატების განცხადებით, მან გონება დაკარგა. ის კარდიოლოგიური ჩივილით ჩაფიძის სახელობის კლინიკაშია მოათავსებული.
შეგახსენებთ, რომ მერიის ყოფილი თანამშრომელი, ოთარ აბესაძე მიმდინარე წლის 12 ივნისს, ქრთამის აღების ფაქტზე დააკავეს.