ეკონომიკისა და მდგრადი განვითარებს მინისტრი აღიარებს, რომ გობეჯიშვილის მიერ ხელმოწერილი ინვესტორისადმი გაგზავნილი წერილი პრეზიდენტს მან გადაცა.
როგორც ვერა ქობალია განმარტავს არ შეიძლება, რომ ინვესტორს უყურადღებოდ მოექცნენ და მის კითხვაზე პასუხი სამით თვით დაგვიანდეს.
ვერა ქობალიას განცხადებით, მას ესმის, რომ გრიგოლ გობეჯიშვილს ბევრი საქმე ჰქონდა, თუმცა არ შეიძლება ინვესტორი ამდენ ხანს ალოდინო და პასუხი დაუგვიანო.
"ამ ინვესტორს, რომელმაც სამინისტროსგან მიღებული პასუხის შემდეგ ივესტიციების ჩადება გადაიფიქრა, თუმცა მასთან ახლა მე და სამეგრელოს გუბერნატორს ზაზა გოროზია პირად მოლაპარაკებს ვაწარმოებთ, რომ ინვესტირება კვალვ განახორციელოს", - აღნიშნა ქობალიამ.
შეგახსენებთ, რომ გუშინ, მთავრობის სხდომაზე საქართველოს პრეზიდენტმა მიხეილ სააკაშვილმა სხვადსხვა სამინისტროში არსებულ "არაპროფესიონალიზმსა და ბიუროკრატიზმზე" ისაუბრა.
კერძოდ კი, არაპროფესიონალიზმში სააკაშვილმა ეკონომიკის მინისტრის ყოფილი პირველი მოადგილე გრიგოლ გობეჯიშვილი დადანაშაულა და აღნიშნა, რომ
"მაშინ, როდესაც დღე და ღამე მე და ნიკა გილაური ინვესტიციების მნიშვნელობაზე ვსაუბრობთ, ორი თვის თავზე ეკონომიკის მინისტრის მოადგილე ბიზნესმენს უარის წერილს უბრუნებს~.
სააკაშვილის განცხადებით, მინისტრის იმდროინდელმა პირველმა მოადგილე გრიგოლ გობეჯიშვილმა საპასუხო წერილში ბიზნესმენს განუმარტა, რომ ეს არ არის სასოფლო-სამეურნეო დანიშნულების მიწის ნაკვეთი და ბიზნესმენი სხვაგან გადაამისამართა.
"ეს გრიგოლ გობეჯიშვილი ალბათ, საძმაკაცოში კარგ ბიჭად ითვლება, ალბათ ქელეხებსა და ქორწილებზე დადის, ბავშვებს ნათლავს და ძმაკაცებს ხელს უმართავს, მაგრამ საქართველო მას არ უყვარს. ის არის გაქსუებული, გათავხედებული, თავგასული მოხელე. აი, ვინ არის მთავარი პრობლემა საქართველოსი. არა მტერი და უცხოური აგრესია, არამედ გრიგოლ გობეჯიშვილისნაირი გაქსუებული მოხელეები არიან მთავარი პრობლემა და მთავარი მიზეზი, რომ ჩვენი ხალხი ისევ გაჭირვებაშია. აი, ვინ არცხვენს საქართველოს. გობეჯიშვილი და კომპანია. როცა თანამდებობაზე ადამიანი მუშაობს და მისი ერთადერთი ფუნქცია გადაწყვეტილების მოშორებაა, ამაზე მეტი პრობლემა მან თავის ქვეყანას რა უნდა შეუქმნას. ნორმალური თანამდებობის პირი როგორ მოიქცეოდა გეტყვით, ნორმალური მინისტრი დაურეკავდა ამ ბიზნესმენს, დაპატიჟებდა კაბინეტში ან კაფეში, მოეფერებოდა და დღეგამოშვებით დაურეკავდა და ჰკითხავდა: მოდიხარ თუ არა?~, - განაცხადა პრეზიდენტმა.
ცნობისთვის, გრიგოლ გობეჯიშვილი ეკონომიკური განვითარების სამინისტროში ზურაბ პოლოლიკაშვილთან ერთად მივიდა. ის მინისტრის პირველი მოადგილის თანამდებობას იკავებდა. გობეჯიშვილი 2004-2007 წლებში ფინანსთა მინისტრის მოადგილედ, ხოლო 2007-2009 წლებში შემოსავლების სამსახურის უფროსად მუშაობდა. ეკონომიკის მინისტრად ვერა ქობალიას დანიშვნის შემდეგ გობეჯიშვილმა თანამდებობა დატოვა. მის ადგილზე კი არჩილ კეკელია დაინიშნა.