შს მინისტრის მოადგილის ნათია მეზვრიშვილის განცხადებით, Birja Mafia-ს საქმეზე, ამ ეტაპისთვის, პოლიციელთა ბრალეულობაზე საუბარი არასერიოზულია.
"გადაწყვეტილებას უნდა გავეცნოთ დეტალურად. ვნახოთ, რა სამართლებრივი შეფასება მისცა ამ ყველაფერს პროკურატურამ, სასამართლომ და ამის შემდეგ მივიღოთ გადაწყვეტილება. ამ ეტაპზე პოლიციელთა ბრალეულობაზე საუბარი არასერიოზული იქნება, სანამ გადაწყვეტილებას არ ვნახავთ", - განაცხადა მინისტრის მოადგილემ.
საქართველოს პროკურატურამ განსაკუთრებით დიდი ოდენობით ნარკოტიკული საშუალების უკანონოდ შეძენა და შენახვის ფაქტზე ბრალდებულების მიმართ სისხლისსამართლებრივი დევნა შეწყვიტა. უწყების ცნობით, აღნიშნულის მიზეზი სისხლის სამართლის კანონით გათვალისწინებული ქმედების არ არსებობაა.
,,პარალელურად საქართველოს პროკურატურაში მიმდინარეობს გამოძიება გ.ქ.-ს და მ.მ.-ს მიმართ საქართველოს შინაგან საქმეთა სამინისტროს ცალკეული თანამშრომლების მიერ ძალადობით სამსახურებრივი უფლებამოსილების გადამეტების და განსაკუთრებით მძიმე დანაშაულის შესახებ სისხლის სამართლის საქმეზე მტკიცებულების ფალსიფიკაციის ფაქტებზე, დანაშაული გათვალისწინებული საქართველოს სისხლის სამართლის კოდექსის 369' მუხლის მესამე ნაწილითა და ამავე კოდექსის 333-ე მუხლის მესამე ნაწილის "ბ" ქვეპუნქტით და მიღებული შედეგების შესახებ დამატებით ეცნობება საზოგადოებას", - ნათქვამია პროკურატურის განცხადებაში.
