„ჩვენ წარვადგინეთ მასალები, რომელიც ადასტურებს, რომ ადეიშვილის ხელმძღვანელობის პერიოდში, ბიძინა ივანიშვილის პრემიერ-მინისტრობის დროს ზუსტად იგივე წესით, იმავე ტიპის ხარჯები გაიწეოდა სახელმწიფო დაცვის სპეციალური სამსახურის მიერ, რაზეც დღეს თეიმურაზ ჯანაშია სამართლდება“, - ამის შესახებ ე.წ პიჯაკების საქმეზე ბრალდებულის, სახელმწიფო დაცვის სპეციალური სამსახურის ყოფილი უფროსის, თეიმურაზ ჯანაშიას ადვოკატმა, ბექა ბასიალაიამ განაცხადა.
ადვოკატის თქმით, მოსამართლემ გააკეთა მკაფიო განმარტება, რომ ეს საქმე მისთვის ცნობილია და სადაო არ არის, შესაბამისად, ამ მიმართულებით, დამატებითი მასალების წარმოდგენის საჭიროება აღარ არსებობს.
„ეს მასალები კიდევ ერთხელ ადასტურებს პროკურატურის და საქართველოს ხელისუფლების შეთანხმებულ ქმედებებს, იმასთან დაკავშირებით, რომ 2013 წლის მასალებს გრიფით საიდუმლოს არ ხსნიან. მასალები პროკურატურაში დევს და ის პროკურატურას სასამართლო პროცესებზე არ მოაქვს.
მათ უნდათ, რომ ჯანაშიას წინააღმდეგ შერჩევითი მართლმსაჯულება გაგრძელდეს, რატომღაც 2013 წლამდე არსებულ მასალებს გრიფით საიდუმლო მოეხსნა, შემდგომი პერიოდისას კი არ ეხსნება. შერჩევითი მართლმსაჯულების და პოლიტიკური ქმედების ამაზე მეტი მანიშნებელი რა შეიძლება იყოს ბუნებაში, წარმოუდგენელია“, - განაცხადა ბექა ბასილაიამ.
ე.წ. პიჯაკების საქმის განხილვა დღეისთვის დასრულდა. პროკურატურა ყოფილ პრეზიდენტს, მიხეილ სააკაშვილსა და სახელმწიფო დაცვის სპეციალური სამსახურის ყოფილ უფროსს, თემურ ჯანაშიას სახელმწიფო ბიუჯეტის კუთვნილი თანხის გაფლანგვას ედავება.
საქმის შემდგომი განხილვა 26 დეკემბერს, 11 საათზეა ჩანიშნული.
