"ეს ის ხარჯებია, რომელიც პროკურატურას ამოღებული აქვს, და საზოგადოებას უმალავს, ამაში ჩართულია, სამწუხაროდ, თვითონ პრეზიდენტიც, რომელიც 2013 წლის შემდეგომ განკარგულებებს გრიფით საიდუმლოს არ ხსნის", - ამის შესახებ ე.წ პიჯაკების საქმეზე ბრალდებულმა, სახელმწიფო დაცვის სპეციალური სამსახურის ყოფილმა უფროსმა, თემურ ჯანაშიამ განაცხადა.
ჯანაშიას შეფასებით, თანხები ერთი და იმავე სქემით იხარჯებოდა:
"ისეთ სურათს ქმნიან, თითქოს მხოლოდ 2012 წლამდე იწეოდა პრეზიდენტის წარმომადგენლობითი ხარჯები. დღეს უკვე მეშვიდე სასამართლო გაიმართა, დაველოდები იმ პროცესებს, როცა პროკურატურა ჩემი მუშაობის პერიოდის განხილვაზე გადავა. ადრე თუ გვიან, მაინც მოუწევთ 2013 წლის პრეზიდენტ სააკაშვილის ხარჯების გამომზეურება და ვნახავთ, რომ თანხები აბსოლუტურად ერთი და იმავე სქემით, პრეზიდენტის განკარგულების მიხედვით იხარჯებოდა. ეს ხარჯები აბსოლუტურად ლეგიტიმური იყო და კანონთან წინააღმდეგობაში არ მოდიოდა", - განაცხადა ჯანაშიამ.
ე.წ. პიჯაკების საქმის განხილვა დღეისთვის დასრულდა. პროკურატურა ყოფილ პრეზიდენტს, მიხეილ სააკაშვილსა და სახელმწიფო დაცვის სპეციალური სამსახურის ყოფილ უფროსს, თემურ ჯანაშიას სახელმწიფო ბიუჯეტის კუთვნილი თანხის გაფლანგვას ედავება.
საქმის შემდგომი განხილვა 26 დეკემბერს, 11 საათზეა ჩანიშნული.