თუ სააკაშვილი დაკითხვას მეორედაც ჩაშლის, მივიღებთ კანონით გათვალისწინებულ ზომებს, - ამის შესახებ პროკურორმა ალექსანდრე გოვორუშჩაკმა განაცხადა. მისი თქმით, სააკაშვილს უკრაინის გენერალურ პროკურატურაში დაკითხვაზე კიდევ ერთხელ გამოიძახებენ.
„ეჭვმიტანილმა სააკაშვილმა არ შეასრულა ეჭვმიტანილის სტატუსით გათვალისწინებული ვალდებულებები, ამიტომ მას დაკითხვაზე მეორედ გამოიაძახებენ. თუ სააკაშვილი დაკითხვას მეორედაც ჩაშლის, გენერალური პროკურატურა კანონით გათვალისწინებულ ზომებს მიიღებს”, - განაცხადა ბრიფინგზე გოვორუშჩაკმა.
მიხეილ სააკაშვილი უკრაინის გენერალურ პროკურატურაში მივიდა, თუმცა დაკითხვაზე უარი თქვა.„ახალი ძალების მოძრაობის“ ლიდერის თქმით, მისი საქმე უკრაინის უშიშროების სამსახურს უნდა გადაეცეს.
სააკაშვილმა ჟურნალისტებთან კომენტარი კიევში გუშინ განვითარებულ მოვლენებზეც ისაუბრა და კულტურის სახლში მომიტინგეების შეჭრას უკრაინის ხელისუფლების მიერ დაგეგმილი პროვოკაცია უწოდა.
