პარლამენტის ვიცე-სპიკერის, თამარ ჩუგოშვილის განცხადებით, საქართველოს პრემიერ-მინისტრის, გიორგი კვირიკაშვილის გადადგომა გამორიცხულია. ამის შესახებ ჩუგოშვილმა გიორგი კვირიკაშვილის შესაძლო გადადგომის შესახებ გავრცელებული ინფორმაციის და საპარლამენტო უმრავლესობის წევრის, ზაქარია ქუცნაშვილის განცხადების კომენტირებისას განაცხადა.
რაც შეეხება მმართველი გუნდიდან ორი ახალი ფრაქციის გამოყოფას, ჩუგოშვილის თქმით, ფრაქციების შექმნა მხოლოდ მენეჯმენტურ მიზნებს ემსახურება.
„გამორიცხულია კვირიკაშვილის გადადგომა. არანაირი კავშირი არ არის ფრაქციების შემადგენლობასა და იმ ისტორიას შორის, რომელიც ჩვენ ეთერების საშუალებით ვიხილეთ. ფრაქციების დაშლა ემსახურება მხოლოდ და მხოლოდ საორგანიზაციო და მენეჯმენტურ მიზნებს და არანაირი პოლიტიკური დატვირთვა ამას არ აქვს,“ - განაცხადა თამარ ჩუგოშვილმა.
ზაქარია ქუცნაშვილმა რამდენიმე დღის წინ პრემიერ-მინისტრის შესაძლო გადადგომის შესახებ დასმულ კითხვაზე საპასუხოდ განაცხადა, რომ გამორიცხული არაფერია.