ამ წუთებში, თბილისის საქალაქო სასამართლოში ე.წ. პიჯაკების საქმის განხილვა მიმდინარეობს. პროკურატურა ყოფილ პრეზიდენტს, მიხეილ სააკაშვილსა და სახელმწიფო დაცვის სპეციალური სამსახურის ყოფილ უფროსს, თემურ ჯანაშიას სახელმწიფო ბიუჯეტის კუთვნილი თანხის გაფლანგვას ედავება.
როგორც მიხეილ სააკაშვილის ერთ-ერთმა ადვოკატმა, დავით კაკოიშვილმა "ჯი-ეიჩ-ენს" განუცხადა, დღევანდელ პროცესზე ბრალდების მხარის წერილობითი მტკიცებულებების გამოკვლევა მოხდება.
ადვოკატის ინფორმაციით, დღეს მოწმეთა დაკითხვა არ იგეგმება.
„ეს საქმე არის პოლიტიკური დევნის ნაწილი. ეს არის უპრეცედენტო საქმე, მთელი მსოფლიოს მასშტაბით, არცერთ ქვეყანაში პრეზიდენტი წარმომადგენლობითი ხარჯებისთვის არავის გაუსამართლებია. ყველა გაწეული ხარჯი, რომელიც წარმოდგენილია საქმეში, იყო კანონიერი - სამივლინებო ხარჯები, პრეზიდენტის სტუმრების ხარჯები, გადაადგილების, ავიაბილეთების და ა.შ. ასეთი ხარჯები ყველა ქვეყანაში გაიწევა, დღესაც - პრემიერ-მინისტრის, პრეზიდენტის და სხვა მაღალი თანამდებობის პირების მიერ. აქ არანაირი არაკანონიერი ქმედება არ არსებობს, პირიქით“, - აცხადებს დავით კაკოიშვლი .
კითხვაზე, მოხდება თუ არა აღნიშნულ საქმეზეც ადვოკატების აცილება, როგორც სააკაშვილის ადვოკატი აცხადებს, ჯერ ამის აუცილებლობა არ იკვეთება.
"სასამართლო სისტემამ ის საქმე პოლიტიკური ანგარიშსწორების იარაღი გახდა და მართლმსაჯულების აღსრულებაზე ხელი აიღო, აქედან გამომდინარე, მიიღო მიხეილ სააკაშვილმა მაშინ ადვოკატების მოხსნის გადაწყვეტილება. ამ საქმესთან დაკავშირებით, ამგვარი მიდგომა არ იკვეთება, თუმცა თუ მომავალში იქნება, შესაძლოა იგივე გადაწყვეტილება მიიღოს", - განაცხადა კაკოიშვილმა.
