„თბილისის 2018 წლის ბიუჯეტი არის საუკეთესო და მასში ყველა ის პრიორიტეტია ასახული, რაც თბილისელების საჭიროებებს პასუხობს“ - განცხადება ამის შესახებ თბილისის საკრებულოს თავმჯდომარემ გიორგი ტყემალაძემ საკრებულოს სხდომაზე გააკეთა, რომელზეც დედაქალაქის 2018 წლის ბიუჯეტის პროექტს განიხილავდნენ.
გიორგი ტყემალაძის თქმით, ბიუჯეტში გათვალისწინებულია ყველა მნიშვნელოვანი მიმართულება და დოკუმენტი ორიენტირებულია იმ ადამიანებზე, რომლებისთვისაც ბიუჯეტის პროექტში გაწერილი პრიორიტეტები აქტუალურია.
თბილისის საკრებულოს თავმჯდომარემ იმედი გამოთქვა, რომ სამომავლოდ ბიუჯეტი კიდევ უფრო გაიზრდება და მმართველ გუნდს მეტი საქმის გაკეთების საშუალება ექნება.
გიორგი ტყემალაძე სხდომაზე ოპოზიციის ბრალდებებსაც გამოეხმაურა და აღნიშნა, რომ კოლეგების გაღიზიანება მცირე პერიოდში გაკეთებულმა ბევრმა საქმემ გამოიწვია.
„ყველანაირად ვეცადეთ, ოპოზიციის დასმულ კითხვებზე არგუმენტირებული პასუხები გაგვეცა, მაგრამ დღეს კიდევ ერთხელ გამოჩნდა, რომ მათი ინტერესი აბსოლუტურად სხვა იყო. მათ არ აინტერესებდათ პასუხები იმაზე, თუ რის გაკეთებას ვაპირებთ 2018 წლის განმავლობაში. მათთვის სრული შოკი იყო მცირე პერიოდში გაკეთებული ამდენი საქმე“, - განაცხადა თბილისის საკრებულოს თავმჯდომარემ გიორგი ტყემალაძემ.
