"კონსტიტუციის პროექტის წინასწარი ვარიანტი, რამდენადაც ვიცი, ვენეციის კომისიამ მოიწონა. დღეს მოვკარი ყური, იძახდნენ, რომ ევროპული კონსტიტუცია კარგია, მაგრამ ახალი საპარლამენტო არჩევნები უნდა ჩავატაროთ, რათა ეს კონსტიტუცია იყოს მიღებული. იმედი მქონდა, რომ ჩვენი პოლიტიკური პარტიები ამ არჩევნების შემდეგ გაიზარდნენ და დამწიფების სტადიაზე გადავიდნენ. ისინი კი იძახიან, რომ 2008 წელს არჩეული პარლამენტი უფლებამოსილი არ არის, ახალი კონსტიტუცია მიიღოს. მინდა შევახსენო, რა განლაგებაცაა 2008 წლის არჩევნების შემდეგ, თვითმმართველობის არჩევნებში მეტი პროცენტი აიღო "ნაციონალურმა მოძრაობამ" და დაახლოებით იგივე განლაგება დაჯდა სხვა ოპოზიციურ პარტიებზე", - განაცხადა სააკაშვილმა.

მისი თქმით, ქართველ ხალხს აზრი არ შეუცვლია და ეს 30 მაისის არჩევნებზედაც დასაბუთდა, ამიტომ ეს პარლამენტი არის ყველაზე უფრო ლეგიტიმური, რომ ახალი კონსტიტუცია მიიღოს.

"მუდმივი ძახილი ყოველი არჩევნების წაგების შემდეგ, რომ გვინდა ახალი არჩევნები, ნიშნავს იმას, რომ მსოფლიო ჩემპიონატი სამ თვეში ერთხელ ჩავატაროთ, რადგან ბრაზილიამ ვერ მოიგო. არაფერსაც არ ჩავატარებთ, მით უმეტეს ესენი ბრაზილია არ არიან და უფრო დაბალი კლასის გუნდები არიან. არჩევნები იქნება მაშინ, როცა უნდა იყოს. ახლა ქვეყანას განვითარება და პოლიტიკური სიმშვიდე სჭირდება", - განაცხადა პრეზიდენტმა.

სააკაშვილის შეფასებით, ყველა ქვეყანა ცხოვრობს არჩევნებიდან არჩევნებამდე, მაგრამ შუალედში ვითარდება ეკონომიკა, იდება ინვესტიციები.

"ამ სიტუაციაში ახალი არჩევნების ჩატარება არის სრულიად გამორიცხული. ჩვენ საპარლამენტო არჩევნები 2012 წელს, ხოლო საპრეზიდენტო 2013 წელს გვაქვს და ვინც არ უნდა იხტუნაოს, ეს ასე იქნება. ისინი თანამდებობებზე ფიქრობენ, ჩვენ კი ქართველ ხალხზე. სწორედ ეს არის ჩვენს შორის განსხვავება", - აღნიშნა საქართველოს პრეზიდენტმა.