საქართველოს პრეზიდენტ მიხეილ სააკაშვილის განცხადებით, თბილისმა ერთპიროვნული მონოპოლია უნდა დაკარგოს და ეკონომიკა და პასუხისმგებლობა მთელ საქართველოზე უნდა გადანაწილდეს. მისი თქმით, საქართველოსთვის იქნება კარგი თუ თბილისი "თავკომბალა" აღარ იქნება. ამის შესახებ პრეზიდენტმა ქუთაისში განაცხადა, სადაც პარლამენტის შენობის სამშენებლო სამუშაოს დაესწრო.
პრეზიდენტის განცხადებით, ქუთაისში პარლამენტის შენობის მშენებლობა საქართველოში ახალი პოლიტიკური ფსიქოლოგიის მშენებლობას ნიშნავს.
"ეს არის ქვეყნის მთავრი მშენებლობა. ეს არის შენობაზე მეტი, ეს არის ახალი პოლიტიკური გეოგრაფიისა და ახალი პოლიტიკური ფსიქოლოგიის მშენებლობა. იმისთვის, რომ თბილისი და მთელი საქართველო განვითრდეს, დედაქალქი აღარ უნდა იყოს თავკომბალა. ქუთაისი არის დახლოებითი ეთნოგრაფიული ცენტრი საქართველოსი. ის, რომ საკონსტიტუციო სასამართლო არის ბათუმში, ის, რომ თბილისში იქნება მთავრობა და პრეზიდენტი - ნიშნავს იმას, რომ მთელ საქართველოს მოვიცავთ, ეს ნიშნავს, რომ ეკონომიკა მთელ საქართველოზე გადანაწილდება. ჩვენ ვიღებთ ძალიან მნიშვნელოვან პლაცდარმს შავი ზღვისა და აფხზეთის მიმართულებით. ეს არის ძალთა ბალანსის ამოტრიალება, რომელიც საუკუნეების განმავლობაში ჩამოყალიბდა და იზოლაციაში ტოვებდა საქართველოს რეგიონებს", - განაცხადა სააკაშვილმა.
