ტელეკომპანია „რაშა თუდეი,“ რომელსაც რუსეთის ხელისუფლება აფინანსებს, შესაძლოა შეერთებულ შტატებში უცხოელ აგენტად დარეგისტრირდეს. ამის შესახებ ტელეარხის რედაქტორმა მარგარიტა სიმონიანმა განაცხადა. მისივე თქმით, ტელეკომპანიას ამერიკის იუსტიციის სამინისტრომ საბუთების მოსამზადებლად ვადა 13 ნოემბრამდე მისცა. სიმონიანის განცხადებით, უწყების მოთხოვნა დისკრიმინაციულია და ამის გამო ტელეკომპანია სასამართლოში იჩივლებს. რუსეთის საგარეო უწყებაში კი აცხადებენ, რომ მოსკოვმა მომავალ კვირას შესაძლოა ამერიკული მედიის წინააღმდეგ საპასუხო ზომები მიიღოს. საუბარია „რადიო თავისუფლებასა” და “ამერიკის ხმაზე.“
