„საქართველოს კონსტიტუციის ახალი რედაქცია უფრო მაღალი სტანდარტით იცავს შრომით უფლებებს საქართველოში“,- ამის შესახებ საქართველოს პარლამენტის თავმჯდომარემ კონფერენციაზე „შრომითი უფლებები საქართველოში - ცვლილებების დღის წესრიგი“, მისასალმებელი სიტყვით გამოსვლისას განაცხადა.
კობახიძის განმარტებით, ის ცვლილებები, რომელიც განხორციელდა შრომის კოდექსში, ზოგადად და საერთაშორისო სტანდარტებთან დაახლოების თვალსაზრისით - საერთაშორისო საზოგადოებამ პოზიტიურად შეაფასა.
„ეს ჩვენი ხელისუფლებისთვის ძალიან მნიშვნელოვანი იყო. თუმცა, კვლავაც გამოწვევად რჩება შრომის საერთაშორისო ორგანიზაციის (ILO) ზოგიერთ კონვენციასთან შესაბამისობის დახვეწის საკითხი.
მიმდინარე წლის განმავლობაში, განხორციელდა ფუნდამენტური რეფორმა - ვგულისხმობ საკონსტიტუციო რეფორმას და ამ რეფორმის ერთ-ერთი მნიშვნელოვანი ასპექტი იყო შრომითი უფლებების გარანტიების ახლებურად მოწესრიგება და მნიშვნელოვანია იმის აღნიშვნა, რომ საქართველოს კონსტიტუციის ახალი რედაქცია უფრო მაღალი სტანდარტით იცავს შრომით უფლებებს საქართველოში“,- განაცხადა ირაკლი კობახიძემ და დასძინა , რომ შრომითი უფლებების დაცვა არ უნდა განვიხილოთ არსებული ბიზნეს გარემოს შეზღუდვის მცდელობად.
"გთავაზობთ, რომ საქართველოს პარლამენტი გახდეს ღია პლატფორმა ასეთი საჯარო დისკუსიისთვის, რომლის საბოლოო მიზანი და შედეგი იქნება ერთიანი ხედვის - სამოქმედო გეგმის ჩამოყალიბება ჩვენს ქვეყანაში შრომის უსაფრთხოების, შრომითი ურთიერთობების და შრომითი უფლებების საკანონმდებლო საფუძვლების შემდგომი სრულყოფის და მათი ეფექტიანი დანერგვის მიზნით. ვიმედოვნებთ, რომ დღევანდელი წარმომადგენლობით კონფერენცია, იქცევა ამ ღია პლატფორმის ამოქმედების პირველ ნაბიჯად“,- განაცხადა სიტყვით გამოსვლისას ირაკლი კობახიძემ.
